Salva Ruiz foi o protagonista esta mañá na sala de prensa de Abegondo.
O lateral zurdo deportivista, que debutou en partido oficial co Deportivo o pasado sábado ante o Albacete Balompié, apunta que "o resultado non foi o que todos nos gustou. É difícil ver aí ao equipo, pero estamos a comezo de temporada. Isto acaba de empezar. Hai moita xente nova no equipo. Hai cadro e recursos suficientes para cumprir o obxectivo".
Cre que "non é fácil" a situación con 3 derrotas consecutivas: "Un equipo como o Deportivo debe conseguir os 3 puntos cada xornada. É un equipo bastante novo, o míster tamén empeza esta temporada. Para a semana imos mellorar bastante e os resultados van chegar".
Preguntado polos obxectivos do equipo, o futbolista valenciano opina que "o obxectivo non é outro que ascender, da maneira que sexa. Temos que conseguir o ascenso. Un club como o Dépor ten que estar en Primeira. Pero hai que ir aos poucos, pensar no Sporting e ir partido a partido".
Advirte que a Segunda División "é unha competición moi igualada. En 2 ou 3 partidos pasas de estar aí abaixo a meterte na loita polo ascenso, ou ao revés. Hai casos como o Osasuna ou o Alcorcón ao revés o ano pasado, que cambia todo en poucas semanas".
Aprecia a "moitos equipos co mesmo obxectivo. Aínda quedan 38 xornadas e isto é moi longo".
Da derrota ante o Albacete Balompié, recalca Salva Ruiz que "as cousas non se fixeron mal do todo. Está claro que hai moitos aspectos que mellorar. Pero creo que merecemos polo menos o empate ou a vitoria".
Quere transmitir ao deportivismo unha mensaxe de "tranquilidade, de calma, de seguir traballando e mellorando". "Aínda é pronto, hai bo equipo para sacar adiante esta mini crise, se se pode chamar así", engade.
E iso que o calendario non dá tregua, cos 3 partidos próximos en apenas 6 días: "Hai que ir conseguindo vitorias, acompañar esa melloría con resultados desde xa. Estamos capacitados pero sempre desde ese crecemento".
En Xixón ante o Sporting este domingo 15 de setembro (21:00 horas, Gol), "nun campo histórico e moi difícil", o defensor branquiazul espera un Dépor que vaia a por os 3 puntos, "despois de 3 derrotas seguidas, máis se cabe", conclúe.
