O dianteiro venezolano Miku subliñou esta mañá na sala de prensa de Abegondo que estas semanas, despois de dous triunfos consecutivos que levantaron ao equipo ao liderado en solitario do grupo 1 de Primera RFEF, "vívense realmente ben porque o equipo fixo as cousas moi ben para estar onde estamos actualmente. Hai que gozar do momento. Obviamente o noso obxectivo está moi claro pero sempre é bonito saber que estás a comandar a táboa. A gozar porque estamos a facer as cousas ben, pero como dixo o míster é unha tarefa semanal, isto é moi longo e aínda falta moito camiño que percorrer".
Por conseguinte, pide gozar "do que é este ano e do que podemos conseguir todos xuntos, o Club, #ANOSAFORZA, medios de comunicación. Estamos todos na mesma dirección e iso é moi positivo para o deportivismo. O reflexo está aí, no traballo do equipo, a implicación de todos, de até cando xoga o Xuvenil, #ANOSAFORZA responde".
Con cinco goles no seu marcador, opina que "o estado de ánimo é reflexo do que ocorre dentro da cancha. O equipo está a facer bos partidos, tivemos os nosos altibaixos como todo na vida, pero en liñas xerais o equipo está a responder, está a crecer, está a mellorar en moitísimas cousas que ao principio de liga non faciamos tan ben; e iso é motivo de tranquilidade no sentido de que ves que progresa e que aínda non chegou ao seu teito".
Advirte pois que "temos moita marxe de mellora. Podemos mellorar en ser máis eficaces de cara a gol e crear aínda moitas máis ocasións, na xestión dos últimos minutos que se che deches conta nalgúns partidos sufrimos moito... Estes partidos xa se están sufrindo menos, o equipo está a sentirse máis seguro xogando nesa situación. Os dianteiros podemos mellorar aínda de cara a gol, os centrais poden mellorar a saída de balón, os laterais en poñelo e así poderíache dicir mil cosas".
A nivel individual, se esmera o ariete branquiazul en "adestrar, traballar, poñerllo difícil ao adestrador, competir internamente cos teus compañeiros e de forma sa por un posto e cando se xogue tentar facelo o mellor posible".
Así, reitera que un posto no once "hai que gañalo cada día, con adestramento, con actitude, con traballo. Pola miña forma de ser sempre tento ser protagonista e traballo para iso. Teño que honrar a profesión e a profesión é adestrarme como o que máis, traballar día a día. E esas decisións tómanas outros. Vivín todas as situacións: a de xogar máis, xogar menos, a de ser importante, menos importante... Pero a miña actitude sempre foi a mesma e deixei que as decisións as tomen outros. Vexo o que podo facer pola miña banda e non quero que nunca me digan que 'deixaches de facer isto ou que non fixeches isto e por iso non conto contigo'. Fago todo o que teño que facer, o que está na miña man e que outros sexan os que decidan".
En canto á igualdade na competición, Miku recoñece que non a esperaba así pero "co devir das xornadas e vendo todos os equipos paréceme que é unha liga que non é a antiga Segunda B porque estás a reunir aos mellores de cada grupo. Tamén nos considero a nós e a outros tantos do grupo que teñen nivel para xogar en Segunda División. É unha categoría que está moi preto do que é o fútbol profesional e que ten un grupo de equipos que aspiran ao mesmo que nós: con historia parecida ou por orzamento ou porque nos últimos anos estiveron en Segunda. Hai moitos equipos aspirando ao mesmo e o nivel dos equipos así o demostra nos dous grupos".
Preguntado polo rival deste domingo 14 de novembro (12:00 horas, Footters) en ABANCA-RIAZOR, o Extremadura UD, solidarízase co vestiario azulgrana, compañeiros de profesión, e afirma que "oxalá xoguemos, porque iso quere dicir que eles puideron chegar a un acordo ou solucionar algo a súa situación que é moi dura que por sorte non vivín na miña carreira". "É unha tristeza e unha vergoña que isto ocorra a día de hoxe porque encima se eles néganse a adestrar pódenos despedir e case que eles teñen que indemnizar ao equipo por non presentarse. O traballador está amolado e a xente ten que saber que isto é o fútbol, pero é o noso traballo, o noso estilo de vida, a nosa forma de vivir", engadiu.
