- Foto: @FVF_Oficial -
O Deportivo ABANCA atópase nunha semana de parón ligueiro en cadro, posto que un total de 8 futbolistas do primeiro equipo están coas súas respectivas seleccións nacionais: Misa, Noelia Villegas, Athenea, Teresa Abelleira, María Méndez, Kika, Michelle Romero e Gaby.
Gaby, Kika e Michelle Romero participaron no amigable de Venezuela ante a AS Roma
As deportivistas Kika, Gaby e Michelle Romero están concentradas en Roma (Italia), desde o pasado luns 4 ao martes 12 de novembro.
A selección exercítase nas instalacións do Hotel Mancini Park baixo a supervisión de Pamela Conti, Directora Técnica do combinado venezolano.
Hoxe xoves, Venezuela disputou un amigable ante o AS Roma, conxunto que milita na máxima categoría do fútbol italiano, no estadio Tre Fontane da capital transalpina.
Caeron as venezolanas (4-2), nun partido con minutos de xogo para as 3 futbolistas do Deportivo ABANCA. Gaby e Michelle Romero saíron de inicio na primeira metade e Kika xogou a segunda parte.
España sub-20, con Athenea, Teresa e María Méndez, mídese mañá xoves a Rusia
Pola súa banda, Athenea del Castillo, Teresa Abelleira e María Méndez foron convocadas para unha concentración da selección española sub-20 que inclúe dous encontros amigables.
A localidade murciana de San Pedro del Pinatar acollerá esta semana de traballo entre o pasado luns 4 e o domingo 10 de novembro.
O combinado nacional sub-20 disputará nas instalacións do Pinatar Arena Football Center dous encontros amigables, o primeiro deles mañá xoves ante Rusia, co seguinte calendario:
Xoves 7 de novembro
11:30: ESPAÑA - RUSIA
Sábado 9 de novembro
18:30: ESPAÑA - FRANCIA
Só o FC Barcelona, con 4 xogadoras, supera a achega do Dépor ABANCA nesta lista de 21 futbolistas citadas polo seleccionador nacional Pedro López.
Athenea, Teresa e María Méndez coincidiron no combinado nacional sub-19 durante o pasado mes de xullo, cando alcanzaron as semifinais do Campionato de Europa disputado en Escocia. Esa posición outorgou ao equipo español un dos catro billetes da UEFA para a próxima Copa do Mundo sub-20, que terá lugar en Nixeria entre os días 3 e 22 de xullo de 2020.
Primeira concentración da selección española absoluta promesas, con Misa e Noelia Villegas
María Isabel Rodríguez 'Misa' e Noelia Villegas, xogadoras do Deportivo ABANCA, foron incluídas por Montse Tomé na primeira citación da historia da selección española absoluta promesas, un combinado entre a sub-19 e a absoluta.
O funcionamento será como o dun primeiro equipo e un filial, tendo sesións de adestramento simultáneas, podendo disputar partidos de adestramento entre ambas as seleccións.
A porteira e defensa branquiazuis forman parte dunha lista de 18 futbolistas que traballa na Ciudad del Fútbol de Las Rozas desde onte martes 5 a mañá xoves 7 de novembro.
No curriculum de Misa coas diferentes seleccións españolas hai un título Europeo sub-19 e unha participación nun Mundial sub-20, en 2018, no que alcanzou o subcampeonato.
Pola súa banda, Villegas acudiu a diversas sesións de adestramento das seleccións nacionais sub-16, sub-17 e sub-19, aínda que non chegou a disputar partidos oficiais con ningunha delas.
