Os españois Mollejo e Montero foron esta mañá os primeiros internacionais en incorporarse aos adestramentos co Deportivo, na que foi a súa primeira toma de contacto con Luis César Sampedro.
Tanto o atacante como o central completaron toda a sesión matinal con normalidade. Mollejo chegou onte pola tarde á Coruña após 2 partidos de titular coa sub-19: o primeiro deles case completo (foi relevado no minuto 90), e o segundo con 54 minutos de xogo.
Pola súa banda, Montero foi suplente no partido de onte en Montenegro da sub-21; e disputou os últimos 15 minutos do amigable en Cartaxena ante Alemaña.
A viaxe de regreso do defensor foi máis complexa. Saíu onte de Pogdorica, capital montenegrina, á primeira hora da noite; aterrou no Aeroporto de Barajas Adolfo Suárez ás 3.30 da madrugada; e, ás 7:00, colleu outro avión que á primeira hora da mañá aterrou no Aeroporto da Coruña, co tempo xusto para chegar a Abegondo para almorzar co resto dos seus compañeiros.
Só faltan por regresar Lampropoulos e Gaku, que ten a viaxe de regreso máis longa, desde Tadxiquistán.
Con estas dúas ausencias; unidas ás de David Simón, Somma, Koné, Luis Ruiz e Salva Ruiz todos eles con adestramento específico, o técnico deportivista realizou unha serie de exercicios tácticos no campo 2.
Para iso, Luis César contou ademais cos fabrilistas Boian, Eimil, Valín, Bourdal, Mujaid, Martí Vilà, Reinoso, Kanouté e Gandoy.
Esta tarde a partir das 17:00 horas, o cadro volve ao traballo en Abegondo.
