As categorías inferiores da selección española de fútbol teñen postos os ollos en #ANOSACANTEIRA. O campionato de España xuvenil, a irrupción de moitos deles no primeiro equipo, no filial de Tercera RFEF e na UEFA Youth League non pasaron desapercibidas para os técnicos federativos.
Así, catro futbolistas recibiron a chamada da selección española sub-19 que dirixe Santi Denia e da sub-17 de Julen Guerrero: Dani Barcia, Noel e Trilli para a primeira; e Mella para a segunda.
Os dous combinados nacionais concentraranse para uns adestramentos en Alfaz del Pi (Alacante) desde hoxe luns 17 ao mércores 19 de xaneiro, xornada na que ao longo da tarde regresarán á Coruña.
Así pois, Borja Jiménez non poderá contar nestes primeiros adestramentos semanais con Noel e Trilli; e Óscar Gilsanz, no Fabril, con Dani Barcia e Mella.
Noel e Dani Barcia estiveron concentrados coa selección española sub-19 o pasado mes de outubro para xogar dous partidos amigables ante Israel, os últimos antes do torneo clasificatorio para o Campionato de Europa 2022 que se xogou en Luxemburgo con Dani Barcia no equipo español.
Trilli, pola súa banda, acudiu á chamada da sub-19 por última vez a finais de agosto e principios do mes de setembro, do mesmo xeito que Noel e Dani Barcia, pero caeu lesionado o día 5 nun amigable ante México e estivo fóra do grupo durante varias semanas.
Mella, un dos fixos para Manuel Pablo na UEFA Youth League e habitual nos partidos do Fabril ben de inicio ou saíndo desde o banco, xa estivo concentrado coa selección española sub-17 o pasado mes de outubro de 2021 para disputar dous partidos amigables ante Países Baixos en Benidorm e A Nucía.
