RCDeportivo RCDeportivo RCDeportivo
Skip to main content
GL
PORTADA

O Alhama CF murciano, rival do Dépor ABANCA na primeira rolda do playoff de ascenso á Liga Iberdrola

O Deportivo ABANCA medirase ao Alhama CF na primeira eliminatoria da fase de ascenso á Liga Iberdrola, cuxo encontro de ida disputarase en terreo murciano esta mesma fin de semana (27 ou 28 de abril) e o de volta terá lugar en Abegondo o 4 ou 5 de maio.

O Alhama CF accedeu a esta fase de ascenso como subcampión do grupo 7. O primeiro clasificado foi o Valencia Féminas CF B, que non ten a posibilidade de ascender debido a que o primeiro equipo milita na máxima categoría. O conxunto alhameño sumou 61 puntos, grazas a 19 vitorias, 4 empates e 3 derrotas, que lle valeron para avantaxar en 3 puntos ao Villarreal CF, terceiro clasificado. O seu balance goleador foi de 74 tantos anotados e 25 encaixados.

A Ciudad del Fútbol de Las Rozas, sede da Real Federación Española de Fútbol, acolleu na tarde de hoxe martes o sorteo, no que entraron un total de 8 equipos, os 7 campións de grupo e o mellor subcampión.

Após proclamarse campioas do Grupo 1 da Segunda División Nacional, as pupilas de Manu Sánchez deberán superar agora dúas eliminatorias a dobre partido para lograr o pasaporte á máxima categoría.

O outro emparellamento do Grupo B, do que sairía o hipotético adversario branquiazul no cruzamento definitivo polo ascenso, protagonizarano os dous equipos canarios: o CD Femarguín, de Arguineguín, e o CD Juan Grande, de San Bartolomé de Tirajana.

Nesa posible final, o Deportivo ABANCA xogaría o encontro de ida en casa (11 ou 12 de maio) e o de volta en Gran Canaria (18 ou 19 de maio).

Este é o resultado completo do sorteo:

Grupo A
CD SANTA TERESA - CDF OSASUNA FEMININO
CD TACÓN - ZARAGOZA CFF

Grupo B
ALHAMA CF - DEPORTIVO ABANCA
CD FEMARGUÍN - CD JUAN GRANDE