Clarence Seedorf compareceu ante os medios de comunicación na sala de prensa de Abegondo.
O técnico holandés confesou atopar "un grupo con ganas de traballar, con dispoñibilidade que mostrou ao novo corpo técnico. Iso tamén vale para a xente que traballa co Club, moita dispoñibilidade, moita ilusión de traballar xuntos e traballar. Poñer horas para deixar nada. Temos boas sensacións", concluíu.
Preguntado pola afección, comentou o adestrador deportivista que "mostrou o seu afecto ás cores. Iso nunca cambiou. Non creo que teñamos que dicir moitas cousas. Simplemente o grupo merece, polo que eu vin esta semana, o apoio da afección porque son mozos que traballan. Dedicáronse esta semana ao que preparamos. Todo o mundo ten que ter ilusión para cambiar esta páxina rápido, canto antes. É unha ocasión importante para todos. E cando digo todos, digo os xogadores primeiro, para nós como staff técnico, para todo o mundo que traballa no Club e para a afección. Contamos con eles moito". "O apoio da afección vai ser fundamental", insiste.
Advirte Clarence Seedorf que esta primeira cita ante o Real Betis no Estadio ABANCA-RIAZOR (luns 12 de febreiro, 21:00 horas, Gol) "ímolo a facer con orgullo. Entrar no partido con moito orgullo e con moitas ganas de xogar como un equipo".
Do rival, confesa estar "máis preocupado co Dépor. O Betis é un bo equipo, que chega con moito perigo facilmente. Fixeron moitísimos goles, tamén recibiron bastantes. Xoga bastante aberto. Ataca con moitos xogadores porque ten talento e xogadores importantes. Pero impórtame moito como imos entrar nós".
Na súa estrea no banco do Estadio ABANCA-RIAZOR, pide ao seu equipo "ser competitivo, xogar xuntos. Pensar como un equipo. Esa é a primeira cousa que hai que enfocar. Para facer máis cousas necesitamos máis tempo, como todo o mundo pode entender".
Recalca que o seu equipo "é un equipo con valor. A clasificación non reflicte o potencial deste equipo. Hai que volver crer nas súas propias posibilidades. Empezaron a facer isto esta semana. Vimos cousas boas, as ganas de traballar xuntos".
A pesar de que o Dépor, co empate de Las Palmas en Bilbao do pasado venres, arrancará hoxe luns o encontro en penúltimo lugar da clasificación en LaLiga Santander, Seedorf afirma que "non cambia nada. Non falamos ningunha vez da clasificación. Lembrádelo vós todo o tempo. No traballo do fútbol un vólvese tolo se vai mirar constantemente a clasificación. Hai 16 partidos por diante e temos que sacar o máximo de puntos posibles".
