Pedro Mosquera, capitán do Deportivo, tomou a palabra esta mañá na sala de prensa de Abegondo, a pouco máis de 48 horas de retomar a competición após o parón do Nadal.
O centrocampista coruñés pediu "estar máis xuntos que nunca, remar todos para o mesmo lado. Saber que tanto os que xogan como os que non xogamos imos tentar axudar a todo o equipo. Canto máis sumemos todos, moito mellor".
Aínda que recoñece que "nos custa gañar partidos", asegura non obstante que "a actitude no campo sempre é boa. No último partido ante o Celta perdemos pero até o final estivemos aí pelexando. Estou seguro de que todos xuntos podemos ir cara arriba".
Lembra o seu paso polo Elche, "con 14 puntos na primeira volta e salvámonos un mes antes. Aquí ninguén está morto e nós imos ir para arriba seguro".
Nunha semana complicada, con asuntos como a recente saída do Club de Richard Barral ou a solicitude dunha prima por gañar ao Celta na comida de Nadal do primeiro equipo, Mosquera subliñou que "é lóxico que cando as cousas van mal saian estas cousas. Nós temos que facernos fortes e estar todos xuntos, tanto nós, como vós (medios de comunicación), como a afección". Neste sentido, asegura que "o compromiso do cadro é total".
Explica sobre o asunto das primas que o seu comentario "foi en ton distentido no brinde da comida. Non foi que o cadro pedise nada formalmente. Está a darse moita máis importancia da que ten".
Lembra que todo isto chega nun momento importante da temporada, "ante un partido importante (antes de recibir ao Celta) que para min como deportivista, gañarlle ao Celta é das cousas máis importantes que hai nesta vida. Fixen un comentario xocoso e nin sequera estaba o Presidente, estaba un directivo. Como se fan mil nunha comida que normalmente quedan no vestiario. Pero neste caso non foi así".
Do Villarreal, rival este domingo 7 de xaneiro (18:30 horas, Bein LaLiga) no Estadio de la Cerámica, opina Pedro Mosquera que a pesar das baixas que poidan ter, "ten moi bos xogadores. É un cadro confeccionado para estar en Champions. Vai ser un partido difícil. Pero creo que temos opcións de gañar alí".
