O Deportivo 2017-18 bota a andar mañá mércores á primeira hora da mañá en Abegondo, cos recoñecementos médicos rutineiros.
Por grupos, os futbolistas estarán citados desde as 9:00 horas na Cidade Deportiva para pasar polos despachos dos médicos. Haberá analítica, antropometría, exploración física e ecocardiograma.
Ao mediodía, circunstancia que se repetirá durante este verán todos os días que haxa dobre quenda de adestramento, os xogadores reuniranse para comer ás 13:30 horas no Hotel Tryp Coruña. Os Servizos Médicos vixiarán así a correcta alimentación nunha etapa de gran esixencia física.
Pola tarde, ás 19:00 horas, terá lugar o primeiro adestramento sobre o céspede, baixo as ordes de Pepe Mel.
Os futbolistas citados son os seguintes: Juanfran, Fernando Navarro, Álex Bergantiños, Pedro Mosquera, Albentosa, Guilherme, Sidnei, Tytoń, Arribas, Luisinho, Borja Vale, Saúl, Bruno Gama, Rubén, Fede Cartabia, Fede Valverde, Róber e Bicho; ademais dos canteiráns Óscar Pinchi, Edu Expósito, Borja Galán, Francis, Chema, Aarón e Pedro.
Os internacionais Celso Borges, Fayçal Fajr, Andone e Emre Çolak, todos eles con partidos coa súa selección durante o mes de xuño; e Juan Domínguez están citados o mércores 12 de xullo.
