O Dépor ABANCA recibe mañá sábado 26 de novembro en Abegondo ás 11:00 ao UDG Tenerife B en partido correspondente á 10ª xornada de Primera Federación FutFem, retransmitido en directo pola canle oficial de YouTube do Club.
Despois da dolorosa derrota da pasada fin de semana na Ciutat Esportiva Joan Gamper ante o FC Barcelona B, cun gol en propia meta no minuto 87, as branquiazuis buscan reencontrarse cunha vitoria ante #ANOSAFORZA que lles permita sumar 3 puntos e achegarse ao líder, o SD Eibar.
A día de hoxe, As Nosas son terceiras na táboa con 17 puntos, os mesmos que o citado FC Barcelona B, CDF Osasuna e DUX Logroño. Por diante marchan o CP Cacereño Femenino (18 puntos) e na cabeza o cadro armeiro, que suma 21.
Irene Ferreras ten á súa disposición a todo o cadro do primeiro equipo para seguir facendo da Cidade Deportiva un fortín, con 4 triunfos e 1 empate ante o SD Eibar no que vai de temporada; e cun balance goleador moi favorable: 12 tantos a favor e tan só 1 en contra.
En rolda de prensa, a adestradora deportivista desexa que dure esta situación de ter a enfermaría baleira porque "elas están ao límite constantemente tanto en adestramentos como en partidos e é normal que vaian xurdindo cousas. Cando todos os compoñentes do staff e Servizos Médicos imos nunha mesma dirección, e a sorte axuda, podes atopar situacións como a de agora. Estou moi contenta de poder contar con todas elas e agora o quebradizo de cabeza é tomar decisións porque cando tes a todo o cadro tes que tomar decisións que con lesións é máis sinxelo".
Pola súa banda, o UDG Tenerife B é 13º na táboa con 9 puntos, en postos de perigo.
O novo equipo chicharrero preséntase na Cidade Deportiva reforzado cun empate a pasada semana (0-0) no seu campo ante o CDF Osasuna Femenino, un dos candidatos ao ascenso.
Lonxe da illa, o UDG Tenerife B cultivou esta temporada 1 vitoria (0-1 ante a Alba Fundación Femenino) e 3 derrotas, en Oviedo (4-0), Logroño (2-1) e Lezama ante o Athletic Club B (1-0).
O RC Deportivo mantén activo o protocolo de apertura con rexistro de asistentes de Abegondo.
Poden retirar entradas dispoñibles, até esgotar aforamento e sen ningún custo adicional, todas as persoas socias do RC Deportivo que o tramiten formalmente a través da web bancada.rcdeportivo.es, na que deberán introducir o seu ID de socio e os 4 últimos números do DNI. A continuación, seleccionar unha localidade libre na bancada e posteriormente completar os seus datos de contacto e a dirección de correo electrónico onde recibir a entrada.
Con eses mesmos datos doutras persoas socias, unha única persoa pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición e localización na instalación.
O Club solicita que unicamente tramiten a entrada aquelas persoas socias que vaian poder acudir ao partido, para evitar que queden afeccionados sen poder asistir unha vez completado a repartición do aforamento nun proceso 100 % telemático.
Tamén está habilitado simultaneamente o sistema de venda de entradas para o público en xeral, a través da mesma plataforma en bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para afeccionados sen carné do RC Deportivo é de 10 euros.
Finalizado o choque, o Dépor ABANCA adestrarase de novo o domingo 27 de novembro ás 9:00 horas en Abegondo.
