O Deportivo ABANCA encara mañá sábado 19 de decembro ás 13:00 horas (campo de Matapiñonera de San Sebastián de los Reyes) sen ningún tipo de confianza a visita ao Madrid CFF, en partido correspondente á 12ª xornada na Primera Iberdrola.
Será o penúltimo encontro oficial antes do parón do Nadal, posto que o martes 22, o equipo de Manu Sánchez recibe en Abegondo ao FC Barcelona.
O técnico deportivista alertou en rolda de prensa esta semana sobre o rival: "Está nun gran momento de forma, de resultados. Está moi ben traballado, moi ben conxuntado. Está a saírlles todo. Imos tentar poñerllo difícil e sacar algo positivo para nós".
Por exemplo a pasada xornada, o Madrid CFF, sétimo na táboa con 18 puntos pero con dous partidos menos xogados, sorprendeu (0-1) ao todopoderoso Atlético de Madrid en campo colchoneiro.
Para esta complicada saída, o Deportivo ABANCA conta coas baixas de Sullastres e Kenni; ademais de Alba Merino, sancionada por acumulación de amoestacións.
Por contra, a meta Jessica é a única representante do Deportivo ABANCA B na expedición deportivista.
O Deportivo ABANCA viaxa esta mesma tarde, con esta folla de ruta:
Venres 18 de decembro
15:30: Adestramento en Abegondo
20:40: Saída o voo do Aeroporto da Coruña con destino ao Aeroporto de Madrid - Adolfo Suárez
21:50: Chegada aproximada e traslado ao hotel Eurostars Madrid Congress
Sábado 19 de decembro
13:00: Madrid CFF - Deportivo ABANCA, en Matapiñonera (San Sebastián de los Reyes)
Ao concluír, traslado en autocar á Coruña