A Ciudad del Fútbol de Las Rozas, sede da Real Federación Española de Fútbol, acollerá mañá martes 23 de abril, a partir das 16:00 horas, o sorteo dos playoffs de ascenso á Liga Iberdrola, no que estará presente o Deportivo ABANCA.
Após proclamarse campioas do Grupo 1 da Segunda División Nacional, as pupilas de Manu Sánchez deben afrontar agora unha eliminatoria fronte a un dos outros 6 campións de grupo e o mellor subcampión, que sairá dun sorteo puro, sen distinción de cabezas de serie nin por criterios xeográficos.
Deses 4 duelos sairán outros tantos gañadores, que disputarán 2 cruces máis, cuxos vencedores participarán o próximo curso na Liga Iberdrola. O sorteo dividirá ás 8 escuadras en 2 bloques de 4 equipos cada un, co cal todos eles saberán de que eliminatoria sairá o seu hipotético rival na segunda rolda, a que determinará os billetes á división de honra.
Estes son os posibles rivais do Deportivo ABANCA:
- CDF Osasuna Femenino (campión do Grupo 2, por diante de Deportivo Alavés e SD Eibar)
- Zaragoza CFF (campión do Grupo 3, por diante de CE Seagull, de Badalona, e FC Barcelona B)
- Santa Teresa CD, de Badaxoz (campión do Grupo 4, por diante de Granada CF e CFF Cáceres)
- CD Tacón, de Madrid (campión do Grupo 5, por diante de CD Parquesol, de Valladolid, e Atlético de Madrid B)
- CD Femarguín, de Arguineguín-Gran Canaria (campión do grupo 6)
- CD Juan Grande, de San Bartolomé de Tirajana-Gran Canaria (segundo clasificado do grupo 6)
- Alhama CF, de Alhama de Murcia (subcampión do grupo 7, tralo Valencia Féminas CF B, que non pode ascender)
Os encontros de ida da primeira eliminatoria celebraranse os días 27 ou 28 de abril, mentres que a volta será o 4 ou 5 de maio. As finais terán lugar o 11 ou 12 de maio (ida) e 18 ou 19 de maio (volta).
Os 6 conxuntos eliminados formarán parte a próxima temporada da nova Primeira B, que estará composta por 2 grupos de 16 equipos cada un. Os 4 primeiros clasificados da presente temporada en cada grupo de Segunda División, ademais dos 4 mellores quintos, e os 2 descendidos da Liga Iberdrola completarán os 32 participantes.
