RCD / NOVAS

O Dépor Abanca pechou en María Pita dous días de homenaxes

22/05/2019 18:28

Coa visita ao Palacio Municipal de María Pita concluíron dous días de homenaxes ás xogadoras do Deportivo ABANCA que lograron senllos ascensos de categoría: á liga Iberdrola o primeiro equipo e a Segunda Nacional o filial.

As actividades comezaron onte pola tarde coa visita que as xogadoras de Manu Sánchez fixeron na Cidade Deportiva da Torre ao adestramento do Dépor Genuine. A sorpresa emocionou aos xogadores e xogadoras do equipo Genuine, que durante a temporada animaron sen cesar ás súas compañeiras desde as bancadas da Cidade Deportiva de Abegondo.

Após unha foto fronte á Torre de Hércules, a segunda das paradas foi no Estadio ABANCA-RIAZOR para compor un 1 na bancada do municipal coruñés xunto aos directivos do Club, que xa antes acompañaran a visita á Torre, na que Tino Fernández quixo despedirse como presidente dos membros do equipo branquiazul.

A primeira recepción da tarde tivo lugar nas novas instalacións da sede de ABANCA en Rúa Nova, onde o seu conselleiro delegado, Francisco Botas, deu a benvida e os parabéns, en nome de todos os empregados de ABANCA, aos dous equipos do Dépor. Após el, Tino Fernández quixo recoñecer ás 4 persoas que máis empuxaron o proxecto común: Jorge Mahía e Susana Ortiz de ABANCA, e Pablo Pereiro e Manu Sánchez, do Deportivo. Tamén tivo un recordo para a traxectoria de case seis anos desde que a creación do equipo expúxose por primeira vez, sen esquecerse das trabas e dificultades que tivo no seu nacemento dentro da cidade este equipo agora de Primeira División.

Despois de gozar dun cóctel, o bus do Dépor continuou percorrido até A Cervecería de Estrella Galicia en Catro Camiños, onde a quenda da benvida correu a cargo de Jose Villanueva, director de patrocinios de Hijos de Rivera, que trasladou ao equipo a felicitación de toda a compañía, en especial do seu Conselleiro Delegado, Ignacio Rivera. Após o brinde e a cea, a festa do Dépor Abanca continuou até ben entrada a madrugada.

Ao mediodía de hoxe, o peche de actos tivo lugar no Palacio Municipal de María Pita, onde o Alcalde, Xulio Ferreiro, e a corporación municipal homenaxearon, en nome da cidade da Coruña ao seu novo equipo de Primeira. Foi un acto tamén de agradecemento mutuo, polo traballo común realizado entre o Deportivo e o Concello no último lustro, nos últimos días antes da renovación de cargos tanto no consistorio como na praza de Pontevedra.