O Deportivo encara mañá domingo 30 de xullo (20:30 en España -19:30 en Portugal-, TVG) no Estadio do Dragão (O Porto) o reto máis complicado da pretemporada, a visita a un equipo de Champions League como é o FC Porto.
O conxunto luso, que arranca a liga o 9 agosto, 11 días antes que o branquiazul, aproveitará a visita deportivista para presentarse ante a súa afección.
Será o regreso do Dépor ao estadio que visitou por única vez no ano 2004, nas semifinais da Liga de Campións. Naquela ocasión houbo empate (0-0) nun partido con escasísimas oportunidades de gol.
Pepe Mel citou a 22 futbolistas. Caen por lesión: Borges, cun pisotón nun pé; Tytoà Â, cunha sobrecarga nun cuádriceps; e Carles Gil.
A directiva do FC Porto fixou en 20 euros o prezo das entradas para os afeccionados branquiazuis, situados na Arquibancada Nascente do Estadio do Dragão. Poderanas adquirir nos propios despachos de billetes do recinto deportivo portense.
O equipo desprázase mañá a Portugal, segundo este plan de viaxe:
Domingo 30 de xullo
10:30: Saída en autocar ao Porto
12:30 (13:30 en España): Chegada aproximada ao Hotel AC Porto
19:30 (20:30 en España): FC Porto - Deportivo, no Estadio do Dragão
Ao finalizar, regreso en autocar á Coruña
Luns 31 de xullo
2:00: Chegada aproximada á Coruña
Tras o encontro, o equipo adestrarase de novo na Cidade Deportiva de Abegondo o martes 1 de agosto ás 10:00 horas. O luns 31 haberá xornada de descanso.
O adestramento desta mañá, cos canteiráns Edu Expósito e Francis, foi fundamentalmente táctico, con especial fincapé nos movementos defensivos e a saída de balón.
Os técnicos acurtaron a duración e a carga da sesión, dada a entidade do rival de mañá.
Adestráronse con Fran Molano, readaptador do primeiro cadro, os futbolistas Juan Domínguez e Carles Gil.
