O Dépor Genuine desprazouse o pasado venres a Málaga, onde onte domingo concluíu a segunda fase de LaLiga Genuine 2021-2022, nun emblemático escenario como o estadio de La Rosaleda, que celebra o seu 80º aniversario.
Andrés Manuel Barbeito, Gabriel Cives, Sergio Díaz, Álvaro García, Alejandro Gómez, Saúl Jiménez, Gabriel López, Álvaro López, Samuel Martínez, Anxo Martínez, David Miranda, Alejandro Agustín Pereira, José Manuel Serrano, Daniel Trasancos, Cristian Vázquez e Mario Ventura foron os 16 futbolistas convocados polos adestradores Lucía Otero e Carlos García para esta segunda xornada.
Os rivais do Dépor Genuine foron Fundació Barça, SD Eibar Fundazioa e RCD Mallorca. Na xornada do sábado, os branquiazuis caeron ante ambos os equipos azulgrana e na matinal do domingo non puideron bater ao conxunto balear.
Os resultados do Dépor Genuine foron os seguintes:
Sábado 14 de maio
DÉPOR GENUINE 0 - FUNDACIÓ BARÇA 2
SD EIBAR FUNDAZIOA 3 - DÉPOR GENUINE 1
Domingo 15 de maio
DÉPOR GENUINE 0 - RCD MALLORCA 2
A pesar das tres derrotas, o Dépor Genuine mantén a sétima posición entre os 18 equipos que compoñen o Grupo Compañeirismo, con 10 puntos e 155 puntos fairplay. Na primeira fase, disputada a inicios do pasado mes de abril en Las Palmas de Gran Canaria, o Dépor Genuine venceu a Real Betis Balompié e Fundación Albacete e perdeu ante o Fundació Futbol Base Reus.
A fin de semana concluíu coa tradicional entrega de medallas a todos os xogadores e xogadoras participantes por parte do presidente da Fundación LaLiga, Fernando Sanz; os Embaixadores de LaLiga Aritz Aduriz e Fernando Morientes; o administrador xudicial do Málaga CF e presidente da Fundación Málaga CF, José María Muñoz; así como outros representantes institucionais das entidades organizadoras e das marcas asociadas á competición.
LaLiga Genuine 2021-2022 concluirá dentro de dúas semanas coa disputa da terceira e definitiva xornada nas Instalacións de Lezama, a cidade deportiva do Athletic Club, en Bilbao, os días 3, 4 e 5 de xuño.
