José Luis Martí imprimiu esta mañá unha marcha máis ao adestramento do Deportivo en Abegondo.
O técnico branquiazul, tal e como reiteran os seus futbolistas nas súas comparecencias públicas, márcase como un dos seus propósitos o ser capaces de prolongar máis tempo o vindeiro domingo 21 de abril en ABANCA-RIAZOR ante o Extremadura UD (16:00 horas, LaLiga 1|2|3) o ritmo dos primeiros 30 minutos do pasado sábado en El Sadar, nos que dominou ao líder de LaLiga 1|2|3, o CA Osasuna.
"Imos tentar alargar no tempo a primeira media hora de Pamplona, con esa intensidade, presionando arriba. Se facemos iso e conseguímolo manter durante máis minutos, o partido pode ser noso", explica Pedro Mosquera en rolda de prensa.
Por este motivo, hoxe a sesión estivo marcada polo alto ritmo e intensidade, cun exercicio de duelos e partidos en espazo reducido, nos que non participaron Pedro Sánchez e Diego Caballo, segundo programación dos Servizos Médicos.
Ademais, o adestrador branquiazul completou a mañá sobre o céspede cun traballo táctico de ataque no campo 2.
Estiveron á marxe do grupo Krohn-Dehli, David Simón e Carlos Fernández, estes dous últimos futbolistas co readaptador Fran Molano.
Os fabrilistas Montiel e Valín, xunto ao meta xuvenil Alberto, traballaron hoxe co primeiro equipo. Os dous primeiros retiráronse antes ao vestiario para poder viaxar co Fabril a Madrid.
Mañá xoves 18 de abril, o cadro está citado de novo ás 11:00 horas en Abegondo.
