- Julito, no centro da imaxe entre o técnico José María Blanco e o seu axudante Manolo Varela Bardanca, co cadro do Xuvenil A campión de España en 1996 (foto cedida por Pablo López Vidal a recordos.rcdeportivo.es) -
Julio Cagiao Campos, delegado de varios equipos da canteira deportivista durante case 30 anos e principalmente do Xuvenil A que se proclamou campión de España en 1996, faleceu este luns aos 90 anos de idade.
'Julito', como era coñecido cariñosamente polos centos de xogadores que pasaron polos seus equipos, colaborou co Club como delegado na canteira branquiazul desde comezos dos anos 70 até a conclusión da Temporada 2001-2002, cando abandonou a actividade nas filas do Xuvenil B. Con anterioridade á súa etapa deportivista fomou parte do Maravillas SD e na súa mocidade foi boxeador aficionado.
O RC Deportivo desexa mostrar o seu máis sentido e sincero pésame a familiares, amigos e ex compañeiros. DEP
