O Dépor pecha a semana cun adestramento baixo a choiva cordobesa
Córdoba transformouse en Galicia durante boa parte da estancia do equipo deportivista na cidade andaluza.
Nada máis concluír o encontro no Arcángel, comezou a chover e xa non cesou ata que o Dépor emprendeu a viaxe de regreso, este mediodía.
Así pois, a persistente choiva, inusual nestas áridas terras, foi a protagonista do adestramento do equipo deportivista esta mañá na Cidade Deportiva do Córdoba CF, ás 10:00 horas, apenas 12 despois de finalizar o choque do Arcángel.
Só faltou no campo Krohn-Dehli, que quedou no hotel de concentración con tratamento médico e de fisioterapia, á espera de probas médicas na musculatura aductora da coxa esquerda, 'tocado' onte na segunda parte.
Como é habitual, os futbolistas titulares onte á noite (David Simón, Domingos, Pablo Marí, Álex Bergantiños, Vicente Gómez, Carles Gil, Quique González e Carlos Fernández) realizaron sobre o céspede só a primeira parte do adestramento: series de carreira e estiramentos. Todos eles acabaron no hotel, na padiola dos fisioterapeutas.
O resto dos xogadores desprazados a Córdoba, incluído Saúl por disputar pouco máis de media parte, realizou un quecemento, roldo e fútbol reducido; por espazo de hora e media.
A expedición regresa esta tarde á Coruña, con este plan de viaxe:
Domingo 21 de outubro 16:15: Saída do voo do Aeroporto de Sevilla con destino ao Aeroporto da Coruña 17:40: Chegada aproximada ao Aeroporto da Coruña
Mañá luns haberá xornada de descanso. O equipo volve aos adestramentos o martes ás 11:00 en Abegondo.