O Bilbao Athletic rompeu a serie vitoriosa do Dépor, que quedou en catro triunfos consecutivos, ao arrancar un empate de ABANCA-RIAZOR nun partido dominado claramente polos branquiazuis que, con todo, non xeraron grandes ocasións e ademais víronse por detrás do marcador na segunda metade.
O técnico deportivista, Borja Jiménez, realizou dúas modificacións con respecto ao once titular que presentou o domingo pasado no Cerro del Espino fronte ao CF Rayo Majadahonda. Héctor Hernández regresou ao lateral esquerdo en detrimento de Diego Aguirre e Juan Carlos Menudo substituíu a Carlos Doncel na liña ofensiva.
O Deportivo exerceu de claro dominador do encontro nos primeiros 45 minutos. Os branquiazuis practicamente monopolizaron a posesión, aínda que tampouco foron capaces de xerar unha gran cantidade de ocasións claras de gol. Iso si, o Bilbao Athletic quedou inédito nesa estatística en todo o acto inicial.
A primeira acción de perigo chegou no minuto 5. Un pase da morte de Menudo desde o extremo esquerdo, moi tenso, non foi capaz de rematalo Miku por centímetros. No minuto 24, o dianteiro venezolano si puido rematar un gran centro de Héctor Hernández, pero a súa cabezada, completamente só no punto penalti, foise á esquerda da portería branquivermella.
Esa acción foi o pistoletazo de saída aos mellores minutos en ataque dos branquiazuis, que volveron acariñar o gol no minuto 28. Foi nun centro pasado de Juergen Elitim que controlou Víctor García. O valenciano, case sen ángulo, empalmou un durísimo dereitazo que se foi excesivamente cruzado.
Nos minutos finais chegaron dúas ocasións máis para o Dépor. No minuto 41, unha fantástica manobra de Menudo no interior da área acabou cun suave disparo do andaluz buscando o pau máis afastado. O coiro perdeuse moi preto da madeira. Dous minutos despois, Víctor García recortou cara a dentro e desde o bordo da área rematou co seu pé esquerdo moi preto do mesmo pau do portal visitante.
A segunda metade comezou cun filial bilbaíno un pouco máis ambicioso. Produto diso, no minuto 53 chegou o seu primeiro lanzamento a portería, nun disparo de Nico Serrano que se marchou por riba do traveseiro. Tres minutos despois, os xogadores deportivistas e os máis de 11.000 afeccionados que hoxe se congregaron en ABANCA-RIAZOR protestaron ao unísono unha clara derriba sobre William dentro da área, que o colexiado incomprensiblemente non castigou como penalti.
Despois dun disparo desde fóra da área de Quiles que detivo con facilidade Agirrezabala, o Bilbao Athletic adiantouse no marcador. Corría o minuto 58 cando Artola cabeceou na área pequena un centro de Álvaro Núñez desde o extremo dereito.
Lonxe de descompor ao Dépor, o gol espertou aos branquiazuis, que case de inmediato pasaron a xogar con catro dianteiros coa entrada de Doncel e Noel por Álex e Quiles. Doncel e William colocáronse nos extremos, con Miku e Noel, este baixando un pouco máis a buscar balóns entre liñas e desmarques en profundidade, por dentro.
O brasileiro estivo a piques de lograr o empate no minuto 64, nun disparo afastado que rozou nun defensa e foise moi preto do pau dereito do portal bilbaíno. O empate chegou un minuto máis tarde. Centro de Héctor ao segundo pau que devolveu cara á área pequena Víctor García. No seu intento de despexe, Paredes atopouse coas pernas de Antxón Jaso, onde rebotou o balón antes de introducirse na portería branquivermella.
William puido adiantar ao Dépor no minuto 67, após recoller dentro da área un rexeite en curto da defensa a centro de Héctor Hernández. Con todo, o disparo do brasileiro foise moi por riba do traveseiro.
Aínda que o dominio territorial e do balón correspondeu case en exclusiva ao Deportivo, as ocasións non chegaron. Si as tivo o Bilbao Athletic, por exemplo un disparo cruzado de Adu Malcolm no minuto 78 que Mackay desviou a córner nunha gran estirada. As máis claras opcións para os branquiazuis chegaron no minuto 83, cando Noel rematou fóra unha deixada de William que se lle botou moi encima, e no tempo engadido, nun libre directo de Juergen Elitim ás mans de Agirrezabala.
Con este empate, o Deportivo mantense invicto en ABANCA-RIAZOR, con 5 vitorias e 2 empates en 7 partidos. Ademais, os branquiazuis alcanzan os 30 puntos, para conservar o liderado con 3 puntos de vantaxe sobre o Real Racing Club de Santander e o UD Logroñés, que suman 27, xa que a maioría de perseguidores tampouco conseguiron a vitoria nesta xornada.
RC Deportivo: Mackay, Víctor García, Lapeña, Jaime, Héctor Hernández, Álex Bergantiños (Doncel, min. 61), Diego Villares, Juergen Elitim, Quiles (Noel, min. 61), Miku e Menudo (William, min. 54).
Bilbao Athletic: Agirrezabala, Álvaro Núñez (Ewan, min. 84), Paredes, Antxón Jaso, Kortazar, Prados, Youssouf Diarra, Artola (Adu Malcolm, min. 70), Víctor San Bartolomé (Unai Naveira, min. 70), Luis Bilbao (Guruzeta, min. 26) e Nico Serrano (Lorente, min. 84).
Goles: 0-1 Artola (min. 58); 1-1 Antxón Jaso, en propia meta (min. 65).
Árbitro: Román Román (c. castelán-leonés). Cartón amarelo a Víctor San Bartolomé (min. 45), Paredes (min. 46), Álvaro Núñez (min. 81) e Guruzeta (min. 90).
Incidencias: partido da 14ª xornada do Grupo 1 de Primeira RFEF disputado no Estadio ABANCA-RIAZOR ante 11.093 espectadores.
