RCD / NOVAS

O Dépor tampouco atopa ante o Racing a senda da vitoria (0-1)

16/02/2022 22:53

O Deportivo sumou a súa terceira derrota consecutiva, ao pagar demasiado caro ante o Real Racing Club de Santander o único desaxuste que tivo en todo o partido. A pesar dos tres reveses consecutivos, os branquiazuis continúan á fronte a clasificación ligueira.

Borja Jiménez, técnico deportivista, realizou dous cambios con respecto ao once que presentou en Las Gaunas na matinal do pasado domingo. Saíron do once Álex Bergantiños e Alberto Quiles e entraron Álvaro Rey e Miku.

O partido arrancou cun tremendo respecto por parte de ambos os equipos, que arriscaron pouco co balón nos pés. A primeira ocasión chegou a balón parado, no minuto 8, cando Satrústegui cabeceou un córner no segundo pau. O balón despexouno de novo a saque de esquina un Mackay pleno de reflexos. No minuto 11 respondeu o Dépor, nunha chegada pola dereita de Trilli, lanzado por Lapeña. O servizo do canteirán, raso ao punto de penalti, rematárono defectuosamente primeiro Mario Soriano e despois Álvaro Rey.

Os visitantes mandaban en canto a posesión e dominio territorial, pero ao cuarto de hora a tendencia comezou a cambiar. Unha nova internada con balón á área pequena de Trilli, no minuto 18, non a rematou por pouco Miku. Pol Moreno anticipouse ao venezolano, desviando a córner. O internacional vinotinto foi o protagonista da seguinte ocasión, cando no minuto 27 cabeceou unha falta colgada por Juergen desde a esquerda do ataque herculino. O balón perdeuse á esquerda da portería cántabra.

Na súa primeira xogada trenzada, o Racing logrou adiantarse no marcador. Corría o minuto 35 cando Iñigo chegou desde atrás polo costado dereito da área para aproveitar un balón en profundidade de Soko e bater a Mackay.

O Dépor apertou nos minutos finais da primeira metade, pero non logrou xerar algunha opción clara de remate á portería defendida por Miquel Parera.

Os branquiazuis saíron en tromba na segunda metade, en busca de igualar a contenda canto antes. Trilli estrelou un remate no lateral exterior da rede após rozar en Satrústegui, no minuto 47. Tres despois, un remate á media volta de Miku atrapouno con facilidade o porteiro visitante. A gran oportunidade produciuse no minuto 52, cando William estrelou no pau esquerdo un dos seus clásicos dereitazos após recortar cara a dentro.

Recentemente superada a hora de xogo, Juergen abriu en longo cara á dereita para Trilli, que con campo aberto puxo un balón ao bordo da área pequena que Miku, no seu intento de controlalo, desviou co talón cara á portería, onde Miquel Parera fíxose facilmente coa pelota. No 70, de novo o canteirán lateral dereito recibiu o esférico nun córner xogado en curto. Case sen ángulo, buscou portería pero enviou o esférico por riba do traveseiro. Acto seguido, Quiles protagonizou unha gran acción individual, regateando a tres rivais e deixando á dereita para William, cuxo disparo se estrelou no lateral exterior da rede.

O Dépor empezou a perder clarividencia nas súas chegadas, a pesar de practicamente monopolizar a posesión. O Racing, ao que apenas se lle viu na área de Mackay nos primeiros 40 minutos do segundo acto, chegou en senllos contragolpes, o primeiro no minuto 88 cun centro pifiado de Sergio Marcos que capturou sen apuros Mackay, e o segundo no tempo engadido, cun disparo escorado de Camus que acabou da mesma forma.

Entre medias, Menudo dispuxo da última ocasión coruñesa. O sevillano, completamente só nas inmediacións da área pequena, cabeceou por riba do traveseiro un centro desde a dereita de Álvaro Rey.

A pesar de sufrir a súa terceira derrota consecutiva, o Deportivo conserva a primeira praza, con dous puntos de vantaxe sobre o seu rival desta noite, que ten un partido pendente de disputar.

RC Deportivo: Mackay, Trilli, Lapeña, Jaime (Borja Granero, min. 86), Héctor Hernández (Menudo, min. 86), Diego Villares (Rafa de Vicente, min. 79), Juergen Elitim, Álvaro Rey, Mario Soriano (Quiles, min. 65), William e Miku.

Real Racing Club de Santander: Miquel Parera, Mantilla, Bobadilla, Pol Moreno, Satrústegui, Fausto Tienza, Iñigo (Borja Domínguez, min. 84), Soko (Camus, min. 84), Pablo Torre (Sergio Marcos, min. 65), Arturo (Álvaro Bustos, min. 65) e Manu Justo (Jack Harper, min. 75).

Gol: 0-1 Iñigo (min. 35).

Árbitro: Pérez Peraza (c. tinerfeño). Cartón amarelo a Miku (min. 23), Mantilla (min. 23), Fausto Tienza (min. 27), Juergen (min. 30), o fisioterapeuta visitante Diego Ortiz (min. 57), Satrústegui (min. 79), Iñigo (min. 82) e Miquel Parera (min. 85).

Incidencias: partido aprazado correspondente á 21ª xornada do grupo 1 de Primera RFEF disputado no Estadio ABANCA-RIAZOR ante 20.878 espectadores.