A necesidade de profesionalizar a arbitraxe, os cambios no método de designación, as contraprestacións por ceder xogadores ás seleccións, a súa profesionalización, a importancia da liga Española e do título para a cidade herculina foron algúns dos temas destacados da conversación, na que Augusto César Lendoiro manifestou que "a vitoria do Deportivo representa unha ilusión para cidades pequenas como A Coruña" pero engadiu "debemos saber quen somos, por que estamos onde estamos e de onde vimos, pero ao mesmo tempo ter o orgullo de dicir que tamén podemos chegar arriba do todo".
O presidente deportivista fixo fincapé na necesidade de estudar algún método para asegurar o futuro aos xogadores profesionais e explicou a mentalidade expansiva do club herculino: "tratamos de facer do fútbol unha gran empresa. Os clubs pequenos estamos obrigados a pensar máis e ser máis áxiles"-confesou- "e por iso imos constituír un conglomerado de 10 empresas ao redor do Deportivo".
As fichaxes para a próxima tempada foron unha pregunta sen resposta no programa, no que o presidente branquiazul tamén foi cuestionado polo futuro de Djalminha: "Djalminha a min non me dixo nada do que aparece na prensa de que se quere ir. Hai que ter en conta que é un xogador especialísimo, para o bo e para o malo".
Augusto César Lendoiro aproveitou o programa para facer chegar as súas desculpas a todos aqueles que sentisen ofendidos por algúns cánticos da celebración branquiazul.
Esta mañá tamén participou en "Os Almorzos de RTVE", programa que conduce Luís Mariñas, e onde a profesionalización do presidente do Club herculino foi un dos temas a debate. Para Augusto César Lendoiro o nivel de esixencia e de profesionalización do mundo do fútbol obriga a que teña que estar profesionalizado de arriba a abaixo.
En todos os programas o presidente deportivista recibiu, en nome do deportivismo, o agarimo e a felicitación polo título de Liga conseguido polo Real Club Deportivo da Coruña.
