O Deportivo ABANCA pechou varios partidos e torneos de pretemporada, cara ao segundo curso da súa historia, que arrancará cos primeiros adestramentos o próximo 18 de xullo na Cidade Deportiva de Abegondo.
O conxunto dirixido por Manu Sánchez ten programado como primeiro partido un prato forte, a disputa do V edición do Trofeo Teresa Herrera feminino fronte ao Athletic Club, quinto clasificado na pasada Liga Iberdrola.
O encontro disputarase o 5 de agosto no Estadio ABANCA-RIAZOR, como preámbulo á celebración do LXXII Trofeo Teresa Herrera, decano dos torneos estivais en todo o mundo, entre o RC Deportivo e o West Bromwich Albion inglés.
Uns días despois, o Dépor ABANCA renderá visita ao Sporting Braga. Será o 9 de agosto cando ambos os equipos se enfronten na devandita localidade portuguesa.
O 15 de agosto, as xogadoras branquiazuis desprazaranse a Friol, para disputar o Torneo Concello de Friol, que ben podería ser a partido único fronte ao anfitrión, o CPM Friol, ou en última instancia en formato triangular, cun terceiro equipo aínda por definir. O Campo da Reigosa será o escenario do devandito torneo.
Por último, os días 26 e 27 de agosto, o Deportivo ABANCA participará no XIV Memorial Manuel Fernández Faraldo, o torneo de fútbol feminino máis antigo de Galicia. Este torneo, cuxa sede é a Cidade Deportiva da Torre, disputarase en formato cuadrangular, con semifinais e final.
Estes son os cinco partidos confirmados ata o momento para a pretemporada do primeiro equipo feminino deportivista:
5 de agosto: Deportivo ABANCA - Athletic Club (Estadio ABANCA-RIAZOR)
9 de agosto: Sporting Braga - Deportivo ABANCA (Braga, Portugal)
15 de agosto: Torneo Concello de Friol (A Reigosa, Friol)
26 e 27 de agosto: XIV Memorial Manuel Fernández Faraldo (Cidade Deportiva da Torre)
A estes encontros hai que engadir os que disputará o equipo na Cópa Deputación da Coruña, pendente de sorteo. As datas desta competición, da que o Dépor ABANCA é o actual campión, son as seguintes:
30 de xullo: fase previa
6 de agosto: oitavos de final
13 de agosto: cuartos de final
20 de agosto: semifinais
26 de agosto: final (23 de agosto no caso de que a dispute o Deportivo ABANCA)
O Deportivo ABANCA conta con 22 xogadoras no seu cadro cara á Temporada 2017-2018: Anita, Malena e Sheila (porteiras), Cris, Miga, Miriam, Raquel, Silvia Mérida, Laura Vázquez e Patri Rúa (defensas), María Corral, Tere Abelleira, Kika Moreno, Lía, Gere e Iris (centrocampistas), Estefi, Nuria, Gaby García, Peke, Jone Bilbao e Sara (dianteiras).
