O Real Club Deportivo segue mostrando o seu compromiso co medio ambiente, a sustentabilidade e a reciclaxe. A partir do próximo domingo 16 de decembro os deportivistas que acudan ao Estadio ABANCA-RIAZOR poderán facer uso dalgunha das 122 papeleiras e colectores novos de recollida selectiva repartidas en todo o recinto. 56 contedores con anclaxe, 44 contedores para a recollida selectiva de envases de 120 litros cada un, 10 recolectores cunha capacidade total de 800 litros e 12 cubos que estarán localizados nas oficinas
Esta iniciativa é parte do acordo entre a Xunta de Galicia e Ecoembes para promover a economía circular en Galicia e, máis especificamente, na contorna deportiva de alta competición.
A Xunta de Galicia, o Real Club Deportivo e Ecoembes, a organización ambiental sen ánimo de lucro que promove a economía circular a través da reciclaxe de envases, son os promotores da reciclaxe mediante a implantación de colectores de recollida selectiva.
Con iso facilitarase aos socios, afeccionados e empregados da entidade a recollida selectiva de envases, para a súa posterior reciclaxe, dentro as instalacións do Club. Con esta iniciativa promóvese a economía circular e a xestión de residuos co obxectivo de fomentar valores que van máis aló do fútbol e que benefician á sociedade e que o Dépor promove con outras alianzas con empresas como Ecoalf.
O Real Club Deportivo agradece o respecto cara a este novo equipamento do Estadio ABANCA-RIAZOR e o correcto uso destas papeleiras e colectores gravadas coa imaxe do Club, nos que se poden depositar residuos plásticos, metálicos e tipo brick.
