O Deportivo ABANCA caeu derrotado na súa visita ao UD Granadilla Tenerife, equipo que se converteu na súa 'besta negra', pois en tres enfrontamentos ao longo desta temporada as branquiazuis foron incapaces de vencer.
Primeiro, as tinerfeñas levaron o Teresa Herrera (1-5). Despois convertéronse no único equipo que até hoxe puntuou en Abegondo na Primeira Iberdrola (1-1). E hoxe chegou esta goleada no encontro da segunda volta ligueira.
O equipo canario comezou xerando varias oportunidades grazas á velocidade e potencia de Martín-Prieto. Misa rexeitou até 3 remates da dianteira local nos primeiros 10 minutos. Ademais, viu como a propia ariete do Granadilla Tenerife perforaba a súa portería, pero o tanto era anulado por fóra de xogo.
As rapazas de Manu Sánchez se desperezaron cun córner, que rematou desde o bordo da área, aínda que desviado, Maya Yamamoto. Mediado o primeiro tempo, Peke obrigou a Aline Reis a unha dobre intervención. A brasileira abortou o perigo en segunda instancia cando Gaby axexábaa. Na seguinte acción, o equipo tinerfeño adiantouse no marcador, ao cabecear a serbia Allegra Poljak lonxe do alcance de Misa un centro de Pisco desde a esquerda.
Dez minutos despois, Maya Yamamoto logrou o empate. A xaponesa chegou ao punto de penalti desde atrás, para fusilar á porteira brasileira do Granadilla Tenerife, após recibir un pase da morte de Athenea, que desbordara a Jujuba no extremo esquerdo do ataque coruñés. Só uns segundos despois, as locais estiveron a piques de volver adiantarse. Silvia Doblado estrelou un potente remate no traveseiro e o balón botou sobre a mesma liña de gol.
A segunda metade comezou coa mesma tónica. Aos 25 segundos do reinicio, Martín-Prieto volveu quedar man a man ante Misa, que lle gañou o duelo unha vez máis. Peke puxo en aprietos a Aline Reis pouco despois. A porteira despexou a córner o remate da dianteira vasca. Após ese córner, nunha contra chegou o 2-1. Martín-Prieto gañou a carreira a María Méndez e Noelia Villegas anticipóuselle pero no seu intento de despexe marcou na súa propia portería.
No seguinte cuarto de hora, o Granadilla Tenerife sentenciaba a contenda con tres goles máis, todos obra de Mari Jose, elixida mellor xogadora do pasado Teresa Herrera, en só 11 minutos. Primeiro, cun golazo de calcaño a unha falta colgada desde a dereita. Despois, rematando cruzado unha nova falta picada por Silvia Dobrado. Para acabar, cunha cabezada no segundo pau a centro de Poljak. Este tanto supuxo o 5-2, posto que dous minutos antes María Méndez, ao cabecear un novo libre indirecto lanzado por Teresa Abelleira, fixera o 4-2.
A pouco máis de 10 minutos da conclusión, Kika marcou o 5-3, cun toque de calidade, picando o balón cara ao segundo pau para superar á gardameta local despois dunha internada de Cris. O equipo herculino foise con todo ao ataque en busca dunha remontada heroica, pero non puido ser.
Con esta derrota, a cuarta en 16 partidos, o equipo que dirixe Manu Sánchez mantense na cuarta praza da Primera Iberdrola, con 30 puntos e un partido menos que os equipos que lle preceden na táboa, FC Barcelona (47), Atlético de Madrid (38) e Levante UD (37), e os seus máis inmediatos perseguidores, Athletic Club e EDF Logroño, ambos con 27.
UD Granadilla Tenerife: Aline Reis, Estella (Natalia Ramos, min. 76), Jujuba, Patri Gavira, Pisco, Eva Llamas, Silvia Doblado (Paola, min. 90+2), Poljak, Pleuler, Mari Jose (Joyce, min. 79) e Martín-Prieto (Ana González, min. 57).
Deportivo ABANCA: Misa, Cris, María Méndez, Laura (Nuria, min. 52), Noelia Villegas, Maya Yamamoto (Alba Merino, min. 66), Iris, Teresa Abelleira (Kika, min. 73), Gaby, Athenea (Arbeláez, min. 81) e Peke.
Goles: 1-0 Poljak (min. 22); 1-1 Maya Yamamoto (min. 32); 2-1 Noelia Villegas, en propia meta (min. 51); 3-1 Mari Jose (min. 54); 4-1 Mari Jose (min. 60); 4-2 María Méndez (min. 62); 5-2 Mari Jose (min. 64); 5-3 Kika (min. 79).
Árbitro: Arregui Gamir (c. vasco). Cartón amarelo a Estella (min. 35), Maya Yamamoto (min. 37) e Pleuler (min. 71).
Incidencias: partido da 18ª xornada da Primera Iberdrola disputado no campo de La Palmera (San Isidro, Tenerife) ante uns 500 espectadores.
