O vindeiro luns 15 de xuño, após pechar as súas portas o 13 de marzo a causa do Estado de Alarma e a emerxencia sanitaria, reabre e retoma a súa actividade habitual a Oficina de Atención ao Deportivista (OAD).
Con todas as medidas hixiénico sanitarias esixidas, no seu horario habitual (de 10:00 a 13:30 e de 16:30 a 19:00 horas de luns a venres) e na súa localización do Estadio ABANCA-RIAZOR na avenida de La Habana, a OAD ponse de novo ao servizo presencial de todos os Deportivistas, xa que a súa actividade, en modo telemático, non cesou durante todo este tempo.
Devolucións entradas Dépor-Sporting (10 euros en efectivo ou 15 euros para as DéporTiendas)
A primeira actividade destacada será a devolución do importe das entradas do Dépor-Sporting que finalmente se xogará esta fin de semana a porta pechada. O comprador poderá solicitar o reembolso do importe no prazo de 30 días naturais desde a data de apertura da OAD (15 de xuño). Para iso é imprescindible entregar a entrada física. A devolución será en efectivo (10 euros) ou mediante un bono de 15 euros para utilizar nas DéporTiendas.
Transcorrido o prazo de 30 días naturais desde o 15 de xuño sen que o comprador solicite a devolución do importe correspondente ás súas entradas, entenderase como a renuncia por parte deste á devolución dos importes, que serán destinados a proxectos sociais da Fundación Real Club Deportivo.
