O proxecto presentado polo Real Club Deportivo a LaLiga e beneficiario dos 10.000 euros recadados na terceira edición de Champions For Life: "Sementes de Amanhá" comeza a dar os seus froitos 7 meses despois da entrega do diñeiro.
Polo momento cubríronse dous dos obxectivos do proxecto:
1. A mellora na habitabilidade das casas de orfos "Sementes de Amanhá":
- Construción dunha casa en Magwai.
- Recubrimento con cemento de todas as casas dos orfos en Nkhawo e Makodzakodza.
- Compra de mobiliario para todas as casas de orfos.
2. Actuacións en sanidade, nutrición e escolarización ademais de contribuír á empregabilidade da muller:
- Compra de 100 mantas.
- Cada 15 días envíase leite en po, fariña de millo, polos e produtos alimenticios que achegan proteínas e resto de nutrientes imprescindibles para a súa alimentación.
- Formación todos os días no centro de Satemwa a todas as nais sociais para a xestión das casas de orfos.
- Compra de computadores.
- Campo de Feiras de Satemwa: campamento de vacacións de 10 días de duración para todos os nenos e nenas da casa e de todas as nais sociais no Centro de formación de Satemwa onde desenvolven actividades de lecer, campionatos de fútbol e sométense a probas médicas.
- Compra de calzado para cada neno.
Ademais, fóra da recadación de Champions for Life, o Real Club Deportivo doou o pasado mes de xuño material deportivo para todos os nenos das Escolinhas que foron enviadas a Tete. Con el, todos os sábados organizan o torneo de fútbol Real Club Deportivo.
