Jorge Andrade e Lionel Scaloni compareceron esta mañá ante os medios informativos na sala de prensa de 'O Mundo do Fútbol'.
O central portugués dixo que "agora hai que estar máis unidos que nunca". Felicitou ao deportivismo polo seu comportamento na recta final do partido de onte mércores co Mónaco e lembrou o que vivía cun dos seus clubs anteriores, o Estrela Amadora: "Alí se perdiamos cinco a cero tirábannos de todo. Aquí é diferente. Sempre están connosco".
Pola súa banda, Scaloni asegura que "en sete anos que levo na Coruña non lembro nada semellante", referíndose ao apoio recibido desde a bancada de Riazor. O centrocampista arxentino, que acabou o partido co brazalete de capitán, insiste en que o vestiario está "agradecido" por eses aplausos e cánticos e lembra que "todo o equipo foise ao centro do campo para expresar a nosa gratitude". "Eu estiven a falar con xente do Mónaco e tamén lles chamou a atención eses berros de ánimo", apuntou a continuación. Scaloni cualificou a despedida da liga de Campións como "triste e fodida".
Da afección deportivista tamén falou Augusto César Lendoiro, o Presidente, na zona mixta do Estadio de Riazor, nada máis concluír o último encontro deste ano da liga de Campións: "O deportivimo estivo hoxe á altura das circunstancias".
10/07/2007 21:22 |
Andrade: Grazas a todos. Fun moi feliz no Deportivo
As despedidas sempre son tristes. Con todo, lévome da Coruña e do Real Club Deportivo unha chea de recordos, moitos e bos amigos e sobre todo o agarimo dunha cidade irmá ao meu país e o recoñecemento duns afeccionados que sempre me apoiaron, aínda nos malos momentos.
06/07/2007 20:26 |
Deportivo e Juventus chegan a un principio de acordo para o traspaso de Jorge Andrade
O Real Club Deportivo e a Juventus chegaron hoxe a un principio de acordo para o traspaso do futbolista portugués Jorge Andrade ao cadro italiano. O internacional portugués desprazarase nos próximos días a Turín para formalizar a súa incorporación ao histórico club italiano. Jorge Andrade chegou ao Deportivo na tempada 2002-03 procedente do O Porto de Portugal. Disputou no Deportivo un total de 157 partidos oficiais entre Liga, Champions League, Copa Intertoto e Copa do Rei e anotou tres goles, un deles, ante o Newcastle en Riazor na Copa Intertoto da tempada 2005-06, de moi bela factura.
25/05/2007 11:49 |
Coloccini volve á Selección Arxentina para un amigable en Suíza
O central deportivista Fabricio Coloccini foi citado pola Selección de Arxentina para disputar, o vindeiro sábado 2 de xuño en Basilea, un amigable ante Suíza. Por conseguinte, Coloccini únese a Andrade, Estoyanoff, Aouate, De Guzman, Bodipo e Adrián, con compromisos internacionais; ademais da preconvocatoria de Barragán e Fabricio para o Campionato do Mundo Sub-20.
