Hoxe xoves é o último día para inscribirse na primeira quenda do DéporCampus Cabreiroá de Abegondo, que se iniciará o vindeiro luns 25 de xuño, e xa son 601 nenos os que participarán nalgunha das seis quendas da Cidade Deportiva e 954 no total das 15 sedes.
As inscricións para esta primeira quenda de Abegondo péchanse hoxe ao mediodía. Nesta ligazón podes cubrir o formulario para participar en calquera dos DéporCampus Cabreiroá 2018. O peche do prazo de inscrición de cada quenda producirase ao mediodía do xoves previo ao comezo de cada un deles.
Os DéporCampus Cabreiroá creceron de forma exponencial desde a chegada do actual consello de administración do RC Deportivo. Dun campus cunha única sede e menos dun centenar de nenos e nenas en 2013 pasáronse ás actuais 15 localizacións. Este verán estréanse 6 sedes: Ourense, Cuntis, Dumbría, Boiro, Camargo (Cantabria) e Plasencia (Cáceres), que se suman ás xa existentes en Abegondo, Viveiro, Bertamiráns, Caranza, Monforte, As Pontes, Ordes, Zas e Xenebra (Suíza).
