Os DéporCampus Cabreiroá de Nadal puxeron o seu punto final hoxe mércores 30 de decembro. A sede indoor da Escola RC Deportivo, Pádel Plus, en Alvedro, e o Campo de Fútbol Municipal das Mariñas, en Sada, foron os escenarios desta proposta formativa e de lecer da Fundación Real Club Deportivo.
Un total de 56 alumnos participantes despedíronse hoxe realizando diferentes gymkanas con múltiples desafíos técnicos onde os participantes puideron competir entre eles e de cada grupo saíu un vencedor que conseguiu un pequeno detalle do Dépor. Ademais, para que todos os participantes tivesen a oportunidade de levar un recordo do DéporCampus, realizouse un sorteo de agasallos entre todos os grupos e a cada participante entregóuselle o seu diploma de participación na actividade.
Foron tres xornadas con actividades de carácter lúdico onde máis de medio centenar de nenos e nenas puideron gozar do fútbol baixo a supervisión dos adestradores do RC Deportivo.
A Fundación Real Club Deportivo agradece aos colaboradores a súa predisposición e axuda para que ambas as actividades fosen de novo un éxito neste complicado ano no que, por exemplo, o número de prazas na sede de Alvedro quedou moi limitado ao ser instalacións cubertas.
