A Cidade Deportiva de Abegondo acolleu o pasado mércores 21 de xuño as xornadas de formación dos técnicos dos DéporCampus Cabreiroá, con obxecto de trasladarlles os métodos, planificacións e normativas que promove o sistema de fútbol formativo do RC Deportivo.
Os técnicos dos diferentes clubs colaboradores nos DéporCampus Cabreiroá acudiron a Abegondo para recibir as charlas de José Barcala, responsable de Metodoloxía do RC Deportivo, e Pablo Barros, director dos DéporCampus Cabreiroá.
O primeiro deles explicou en primeiro lugar o "Método Dépor. Estrutura conceptual nos DéporCampus" e máis adiante falou da "Metodoloxía nos DéporCampus. Aplicación e planificación". O segundo trasladoulles a "coordinación, normativa e cuestións organizativas dos DéporCampus".
Os DéporCampus Cabreiroá creceron de forma exponencial desde a chegada do actual consello de administración do RC Deportivo. Dun campus cunha única sede e menos dun centenar de nenos e nenas en 2013 pasáronse ás actuais 11 localizacións. Este verán estréanse 4 sedes: As Pontes, Santiago, Ordes e Zas, que se suman ás xa existentes en Abegondo, Viveiro, Rianxo, Bertamiráns, Ferrol, Monforte e Xenebra (Suíza).
O RC Deportivo organiza esta actividade dirixida polos técnicos do Club co obxectivo de transmitir habilidades e conceptos futbolísticos, ademais dos valores que representa o Dépor: respecto, solidariedade, amizade, xogo limpo, integración, esforzo e felicidade.
Todos os DéporCampus Cabreiroá teñen un horario de mañá de 10:00 a 14:00 horas. A data e hora límite de inscrición para cada quenda é as 12:00 horas do xoves previo ao comezo do mesmo.
Desde esta edición 2017, toda a xestión dos DéporCampus Cabreiroá realízase a través da nova páxina da actividade: deporcampus.rcdeportivo.es/gl. Nela pódese atopar toda a información común a todos os DéporCampus Cabreiroá e específica de cada unha das sedes.
