Os futbolistas titulares o pasado sábado ante o Levante no Estadio ABANCA-RIAZOR tiveron unha mañá en Abegondo para recargar baterías. Así, só realizaron a primeira parte do adestramento, cun quecemento e un traballo de posesión.
A continuación, pasáronse pola padiola de masaxe e polo ximnasio, co fin de recuperar forzas despois de moitos minutos de esforzo físico con 10 xogadores sobre o terreo de xogo.
Lucas Pérez marchouse ao seu domicilio con molestias estomacais, Fabian Schär non chegou a saltar ao céspede e Celso Borges, que viu o cartón vermello na primeira metade, si realizou completo todo o adestramento.
Para os demais integrantes do cadro, excepto os lesionados Sidnei, á espera de probas médicas, e Pedro Mosquera, houbo ademais un exercicio de remates a portería e fútbol en espazo reducido, de alta intensidade.
Mañá martes, os futbolistas están citados en Abegondo ás 11:00 horas.
