Juan Ignacio Otero Couceiro, un dos mellores porteiros que deu a canteira coruñesa e galega, sucesor do lendario Juan Acuña na portería do Deportivo, faleceu a pasada madrugada aos 90 anos de idade.
Nado como Floreal Otero Couceiro o 1 de xuño de 1929, no barrio de Hércules, foi un deportista completo que nos seus anos mozos destacou sobre todo na natación, deporte no que chegou a proclamarse subcampión de España na proba de 100 metros costas.
Despois de xogar no Liceo de Monelos, con 17 anos incorporouse á disciplina deportivista. Durante 6 temporadas formou no entón filial branquiazul, o CD Xuvenil.
O 20 de abril de 1952, en partido de volta dos oitavos de final da Copa de España, Otero debutou defendendo a portería do Deportivo. Foi en Riazor fronte ao Valladolid nun encontro que finalizou con empate a 3 goles.
Na Temporada 1952-1953 comezou a relevar con asiduidade a Juan Acuña na portería branquiazul, que defendería nun total de 143 partidos até a súa marcha ao Betis no verán de 1958. O seu último partido foi salvando ao seu querido Deportivo do descenso a Terceira División, na promoción de permanencia en Segunda fronte ao Ourense, o 29 de xuño de 1958 en Riazor (2-1).
Eses 143 partidos divídense en 99 en Primeira División, 30 en Segunda, 7 de Copa, 5 da liguiña de promoción 1952-1953 e 2 da promoción ante o Ourense.
Entre medias, Otero capitaneou ao histórico Deportivo que disputou por primeira vez o Trofeo Teresa Herrera, e que o gañou, en 1955 fronte ao Athletic Club (4-1). Deste xeito, foi o primeiro xogador deportivista en levantar o trofeo amigable máis prestixioso da época e máis lonxevo a día de hoxe.
Anos despois, Chucho –uno dos alcumes polo que era coñecido cariñosamente, igual que Parrocho– colaboraría desinteresadamente na formación dos porteiros da canteira deportivista
O velorio de Otero terá lugar desde as 13:30 horas deste sábado no Tanatorio Servisa, onde mañá ás 10:30 horas oficiarase unha misa. Este martes 30, ás 20:00 horas, a igrexa de María Auxiliadora (Salesianos) acollerá un funeral pola alma de Otero.
O RC Deportivo quere mostrar o seu máis sentido e sincero pésame a familiares, amigos, ex compañeiros e a todo o deportivismo. DEP.