- Paseiro, no centro, substituíndo a Corcuera na 'Orquesta Canaro', o 25 de febreiro de 1951 en Chamartín ante o Real Madrid -
José Fernández Sánchez, máis coñecido no mundo futbolístico como Paseiro, faleceu aos 92 anos de idade o pasado mércores 4 de decembro.
Nacido o 20 de outubro de 1928 en Sada, Paseiro foi xogador deportivista durante cinco temporadas (1946-1951), aínda que soamente xogou dúas e media, xa que foi cedido ao Betanzos (1946-47), Racing de Ferrol (1949-50) e Lucense (primeira metade da 1950-51).
Despois de xogar no Arrancapinos e o Rayo da súa localidade natal, Paseiro incorporouse ao Deportivo en 1946, aínda que debutou un ano máis tarde, tralo seu préstamo ao Betanzos. A súa estrea produciuse o 21 de setembro de 1947 ante o RCD Mallorca en terras baleares, onde o Deportivo se impuxo por 1-3 na primeira xornada da Segunda División 1947-1948. O terceiro tanto foi obra do dianteiro centro sadense.
Foi aquel primeiro curso o mellor de Paseiro coa camiseta deportivista. O Deportivo logrou o seu terceiro ascenso a Primeira tralos logrados en 1941 e 1946. Os branquiazuis quedaron subcampións por detrás do Real Valladolid e o ariete coruñés foi o máximo goleador do equipo, con 18 tantos.
Co salto a Primeira e a chegada de Rafael Franco, Paseiro perdeu protagonismo, pero deixou o seu selo goleador na súa estrea na máxima categoría. O Deportivo impúxose por 3-0 ao RCD Espanyol o 27 de febreiro de 1949 cun 'hat-trick' seu.
Após volver saír cedido a Racing de Ferrol e Lucense, regresou ao Deportivo en febreiro de 1951 para botar unha man á lendaria 'Orquesta Canaro'. Paseiro supliu a Corcuera en 2 encontros do tramo final daquela temporada 1950-51 e vestiu de branquiazul por última vez o 3 de maio de 1951 nos Campos de Sport de El Sardinero, en partido de volta dos oitavos de final da Copa de España fronte ao Real Racing Club de Santander (2-0).
O ariete sadense xogou co Deportivo un total de 32 partidos, nos que marcou nada menos que 24 goles, cunha sensacional media de 0,75 por encontro. Paseiro defendeu a camiseta branquiazuis en Primeira (5 partidos e 3 goles), Segunda (23 e 18) e Copa (4 e 3).
No verán de 1951, Paseiro lanzouse á aventura americana para enrolarse na Universidade de Chile, onde xogou unha soa campaña. Posteriormente militou no club que sufriu os seus dotes goleadores o día do seu debut en Primeira, o RCD Espanyol (1952-1956), antes de colgar as botas despois de dúas campañas en Andalucía: Real Xaén (1956-1957) e Xerez Deportivo (1957-1958).
O RC Deportivo desexa mostrar o seu máis sentido e sincero pésame a familiares, amigos, excompañeros e a todo o deportivismo. DEP.
