RCDeportivo RCDeportivo RCDeportivo
Skip to main content
GL
PORTADA

Pepe Mel apadriñou a segunda quenda do DéporCampus Cabreiroá de Abegondo

Pepe Mel, técnico do Deportivo, entregou esta mañá os diplomas aos 272 nenos e nenas que participaron na segunda quenda do DéporCampus Cabreiroá 2017 de Abegondo que tivo lugar durante toda esta semana.

O acto desenvolveuse no campo de herba sintética (campo 8) da cidade deportiva, ante a presenza de numerosos pais na bancada.

O adestrador branquiazul saudou un por un a todos os nenos, intercambiou impresións con eles, e fotografouse cos 19 grupos e os seus respectivos monitores. Mel foi despedido cunha cariñosa ovación, ao berro de "¡Pepe! ¡Pepe!".

Un sorteo de agasallos e unha foto de familia puxo o punto e final á cerimonia de clausura desta segunda quenda.

Con 6 quendas aínda abertas á inscrición (cuarta e quinta de Abegondo, Rianxo, As Pontes, Ordes e Monforte), xa se superaron os 1.400 inscritos. Este ano, a sede central na Cidade Deportiva do RC Deportivo pasa de 3 a 5 semanas de actividade (a última de xuño e todo xullo). Os DéporCampus Cabreiroá estrean ademais este ano 4 sedes: As Pontes, Santiago, Ordes e Zas, que se suman ás xa existentes en Abegondo, Viveiro, Rianxo, Bertamiráns, Ferrol, Monforte e Xenebra (Suíza).

A próxima semana, do 10 ao 14 de xullo, a actividade do DéporCampus Cabreiroá 2017 será a seguinte: terceira quenda en Abegondo, segunda quenda en Bertamiráns e quenda única en Viveiro.

O RC Deportivo organiza esta actividade dirixida polos técnicos do Club co obxectivo de transmitir habilidades e conceptos futbolísticos, ademais dos valores que representa o Dépor: respecto, solidariedade, amizade, xogo limpo, integración, esforzo e felicidade.

Máis aló das actividades, o equipamento deportivo (composto de camiseta, pantalón e medias), a froita e o zume diarios, o diploma final, a visita dun dos xogadores do primeiro cadro deportivista (sempre dentro das posibilidades do calendario do equipo) e un sorteo final de agasallos, son outros dos atractivos dos DéporCampus Cabreiroá, que teñen un horario de mañá de 10:00 a 14:00 horas.

En todos os casos, os accionistas e socios do RC Deportivo gozan dun desconto, igual que as familias con máis dun membro en paro ou as que inscriban máis dun fillo, ademais das que cada Club coorganizador determine en cada caso.

Desde esta edición 2017, toda a xestión dos DéporCampus Cabreiroá realízase a través da nova páxina da actividade: deporcampus.rcdeportivo.es/gl. Nela pódese atopar toda a información común a todos os DéporCampus Cabreiroá e específica de cada unha das sedes.