O Deportivo realizou esta mañá na Cidade Deportiva de Abegondo a única sesión prevista para hoxe venres 21 de xullo.
A mañá, cos fabrilistas Edu Expósito e Francis, arrancou nun dos ximnasios do complexo deportivista, cun traballo preventivo.
A continuación, e xa sobre o céspede do campo 2, Pepe Mel subliñou aspectos tácticos. Para iso, dispuxo dun partido once contra once a campo completo. O técnico branquiazul parou constantemente o xogo para repartir instrucións aos seus futbolistas.
Para concluír, o equipo exercitou a presión nuns rondos; e un circuíto de velocidade e resistencia puxo o punto e final ao traballo sobre o céspede.
Adestráronse á marxe Gerard Valentín e Carles Gil, cunha sobrecarga leve de adductores.
Mañá sábado, o cadro está citado de novo en Abegondo a partir das 10:00 horas.