Cristóbal Parralo dirixiu esta tarde o seu primeiro adestramento co Deportivo. Acompañado dos seus colaboradores Javier Manjarín e o preparador físico Luís Fandiño, ademais de Julio Hernando e José Ángel Franganillo, deseñou unha sesión de recuperación para os que onte foron titulares ante o Girona. Estes futbolistas (Juanfran, Albentosa, Sidnei, Luisinho, Borges, Guilherme, Cartabia, Valverde, Çolak e Lucas) só realizaron sobre o céspede a primeira parte, o quecemento. A continuación retiráronse ao vestiario, para pasar polo ximnasio e a padiola de masaxe.
Os demais integrantes do equipo, incluído o fabrilista Francis, tiveron un adestramento normal, de alta intensidade, cun exercicio de posesión e fútbol en espazo reducido.
Mañá mércores, o equipo adestrarase de novo en Abegondo a partir das 17:30 horas.
