Raí Nascimento de Oliveira foi presentado este mediodía en Abegondo como novo xogador do Deportivo para o que resta de temporada.
Após posar para os medios gráficos acompañado do Presidente, Fernando Vidal, o novo atacante deportivista, xa na sala de prensa, destacou en primeiro lugar "a máxima confianza de todo o que rodea ao Club, tanto do adestrador cando me falou do proxecto como de toda a directiva. E a historia que ten este Club, aínda que por un accidente está onde está agora mesmo. Esperemos polo onde se merece canto antes".
Desexa "ser feliz aquí, demostrar o meu fútbol"; á vez que lembra este futbolista brasileiro a compatriotas seus como "Bebeto, Mauro Silva ou Djalminha que saíron moi ben. Espero ser un deles".
Precisamente do Dépor, Raí é consciente de que "o obxectivo está claro. Son sete finais que antes de vir estaba a planear desde fóra".
A pesar de que non tivo moitos minutos de xogo no seu ex equipo, o Real Zaragoza, asegura que está preparado para este domingo 31 de xaneiro en ABANCA-RIAZOR ante Unionistas de Salamanca CF (19:00 horas, TVG): "Estiven a adestrar con normalidade e se o míster conta comigo tentarei estar ao nivel dos meus compañeiros".
Defínese como un xogador "de moito traballo. Podo xogar en diferentes posicións de arriba, tanto de mediapunta como banda esquerda ou banda dereita. Mesmo até en punta. Estiven a falar co míster e onde me vexa e póñame tentarei dar o máximo rendemento meu, máximo traballo. E se é con gol, mellor".
Insiste finalmente en que quedan "sete finais de aquí a final de temporada"; aínda que pide "enfocarse no seguinte partido que é o de Unionistas. Partido a partido sacar o mellor de nós".
