Esta fin de semana, só un dos equipos que está en competición oficial en #ANOSACANTEIRA, o Xuvenil B, xogou en Abegondo. Os pupilos de Alejandro Antón e Aldo Duscher, líderes do subgrupo A de a liga Nacional, derrotaron (2-0) onte sábado ao Arosa SC nunha nova demostración de solidez.
Os demais equipos competiron lonxe da Cidade Deportiva hoxe domingo: o Deportivo ABANCA B ante o Umia CF (4-1 en Barrantes - Ribadumia); e o Xuvenil A fronte ao CD Calasanz (0-4 en San Pedro de Visma).
Finalmente, o partido do Fabril no campo da Porta Santa ante o UD Paiosaco H. Añón, previsto para hoxe domingo 17, foi suspendido por un caso positivo de COVID-19 no conxunto larachés.
Agora será o Xuíz de Competición o que estableza unha nova data para a celebración deste encontro correspondente á 13ª xornada no subgrupo A de Terceira División.
Iso si, con Manu Mosquera, que debutou en liga o pasado domingo en Zamora, en proceso de recuperación dunha lesión muscular nun cuádriceps; catro fabrilistas (Adri Castro, Iván Guerrero, Boedo e Javi Sanmartín) e dous xuvenís normalmente ás ordes de Valerón cada fin de semana (Juan Rodríguez e Guille Bueno) entraron na lista do Deportivo para medirse hoxe domingo ao Salamanca CF UDS no Estadio Helmantico. De todos eles só Adri Castro tivo minutos como titular e Boedo estivo a piques de saltar ao terreo de xogo, pero o colexiado sinalou xusto antes o final do partido.
Os resultados da fin de semana foron os seguintes:
Terceira División
Subgrupo A, 13ª xornada: UD PAIOSACO H. AÑÓN - FABRIL, aprazado
Categoría feminina
Primeira Nacional, subgrupo A, 10ª xornada: UMIA CF 4 - DEPORTIVO ABANCA B 1 (Eva Dios)
Categoría xuvenil
División de Honra, subgrupo A, 11ª xornada: CD CALASANZ 0 - XUVENIL A 4 (Dani Barcia, Nájera, Noel e Urdiales)
Liga Nacional, subgrupo A, 9ª xornada: XUVENIL B 2 (Martín Ochoa e Hugo Baldomar) - AROUSA SC 0
