Segunda cita para Hugo Novoa con España sub-16, mañá xoves ante Serbia
O canteirán deportivista Hugo Novoa está concentrado coa selección española sub-16 no Torneo Desenvolvemento UEFA en Belgrado (Serbia).
Outro cadete branquiazul, Trilli, citado inicialmente para participar con España sub-16 no Mundial de Montaigu (Francia), non puido acudir á cita debido a unha lesión.
Ambos os futbolistas pertencen ao Cadete A do Dépor, aínda que Hugo disputou os últimos partidos de liga co Xuvenil A de División de Honra.
A anfitrioa Serbia, Eslovaquia e Ecuador son os rivais de Hugo Novoa en Belgrado.
Mañá xoves 18 de abril, España mídese á anfitrioa Serbia (14:15), nun esixente test para os hispanos, con motivo da segunda xornada.
A selección española debutou no torneo onte martes 16 de abril ante Ecuador, á que derrotou con claridade (4-0). Hugo Novoa xogou completa a segunda parte. Entrou tralo descanso en substitución de Jordi Ortega.
O calendario de partidos, cos resultados dos xa xogados, dos españois, todos eles no Stara Pazova Stadium, é o seguinte:
Martes 16 de abril ESPAÑA 4 - ECUADOR 0
Xoves 18 de abril 14:15: SERBIA - ESPAÑA
Sábado 20 de abril 12:15: ESLOVAQUIA - ESPAÑA
Tanto Hugo como Trilli xa participaron con España esta temporada na última edición da Copa Aegean en Esmirna (Turquía).
Presenza habitual esta temporada en Las Rozas
Esta campaña, ademais de Hugo Novoa e Trilli, foron citados os seguintes canteiráns deportivistas para diferentes categorías da selección española:
- Mujaid (central do Fabril): Xogos do Mediterráneo coa sub-19
- Juan Rodríguez Lima (central do Xuvenil B) e Íker Piedra Blanco (porteiro do Xuvenil B): Adestramentos coa sub-17 e amigable ante Italia o primeiro deles
- Sergio Bernárdez (centrocampista do San Tirso SD): Sportchain AGS Cup e Torneo Pinatar Arena coa sub-15
Por conseguinte, a factoría de Abegondo aos poucos vaise convertendo nun referente para os diferentes seleccionadores nacionais.