O Deportivo de Rubén de la Barrera encara a visita de mañá domingo 17 de xaneiro ao Salamanca CF UDS (16:00 horas, Footters) no Estadio Helmántico con seis canteiráns na lista: Adri Castro, Juan Rodríguez, Javi Sanmartín, Iván Guerrero, Guille Bueno e Boedo, que hoxe mesmo se incorporou aos adestramentos co primeiro equipo. Este polivalente carrilero, que milita no Fabril, chegou ao Club na temporada 2013-14, ás filas do Cadete B. Hoxe viu cumprido un soño e quen sabe se mañá en Salamanca o segundo, o de debutar co primeiro equipo en partido oficial.
Regresan ao equipo Borja Galán e Derik, após superar as súas respectivas lesións musculares e recibir onte venres o visto e prace dos Servizos Médicos; e, por outra banda, quedan fóra por diferentes problemas físicos: Keko, Uche, Bóveda, Claudio Beauvue, Héctor, Miku e Rolan.
No adestramento de hoxe, Rubén de la Barrera dispuxo, após un quecemento, exercicios con movementos tácticos defensivos no campo 2 e ofensivos no 3; e, para concluír, ensaio de accións a balón parado.
O equipo viaxa esta tarde ás 15:30 por estrada desde a Cidade Deportiva e regresará tralo partido.
Rubén de la Barrera citou de novo ao seu cadro o luns 18 de xaneiro ás 11:00 en Abegondo.
