César Cobián aclarou que Sergio ten unha subluxación nun
ombreiro. "Terá que facer traballo de ximnasio e fisioterapia", indicou o
galeno. Pola súa banda, o propio futbolista confesou que é unha sensación "moi
dolorosa, de tres ou catro minutos que se pasan fatal". O futuro, de momento,
non pasa polo quirófano: "Sei que esa é a solución definitiva, pero imos esgotar
as vías. Agora poreime en mans dos fisioterapeutas e de Carlos
(por Carlos Lalín, readaptador físico do club) para que isto non se volva a repetir",
indicou Sergio.
Así mesmo, Luque regresa a Mallorca co Deportivo _xa foi titular no
partido de volta de semifinais de Copa do Rei que o Dépor disputou en Son
Moix_. É consciente de que o cadro balear é un equipo irregular, aínda que
perigoso: "Se teñen un bo día, poden gañarlle a calquera. Aproveitan moi ben
os contragolpes coa velocidade de Etoo, Ibagaza..." Luque espera que o
Dépor estea ao nivel do primeiro tempo da volta de semifinais: "Xogamos moi ben
eses primeiros 45 minutos. Así é como debemos de xogar o domingo todo o
partido", asegurou o dianteiro catalán.
