Sete fabrilistas ás ordes de José Luis Martí, esta mañá en Abegondo
Sete xogadores do Fabril estiveron esta mañá ás ordes de José Luis Martí no adestramento do Deportivo: Álex Cobo, Víctor, Montiel, One, Abeledo, Raúl González e May.
Os titulares onte en ABANCA-RIAZOR ante o Extremadura UD, ademais de Krohn-Dehli, tiveron mañá de ximnasio e recuperación no vestiario, con baños de contraste (frío-calor) e paso pola padiola dos fisioterapeutas.
Só saltaron ao céspede da Cidade Deportiva, ademais dos citados futbolistas do Fabril, os que non actuaron de inicio ante os estremeños, incluídos Carlos Fernández e David Simón. O andaluz e o canario realizaron unicamente a primeira parte do adestramento.
Para este grupo houbo un quecemento, rondos, un exercicio de posesión e, para concluír, fútbol a metade de campo.
Mañá martes, o Dépor volve aos adestramentos ás 11:00 horas en Abegondo, xa para comezar a preparar con todo o grupo a visita deste venres 26 de abril ao CD Numancia (21:00 horas, Gol e LaLiga 1|2|3 TV).