RCD / NOVAS

Somma: "Estou convencido de que imos saír. Confío moitísimo nos meus compañeiros, no corpo técnico, en todos os que traballan no Club"

26/11/2019 20:10

Michele Somma atendeu aos medios de comunicación no Hospital HM Modelo, após protagonizar con Misa, porteira do Deportivo ABANCA, a quinta edición da campaña ‘¡No te arriesgues corazón!', que organiza anualmente HM Hospitales.

O defensor italiano apunta que esta temporada sofre a afección "e nós tamén. Estamos todos no mesmo barco. Estamos a sufrir todos".

Aprecia melloría co empate do pasado sábado en ABANCA-RIAZOR ante o Alcorcón, "pero estamos últimos. Toca seguir así para tentar saír de todo isto canto antes".

A pesar de que aumenta a distancia respecto dos seus predecesores, Somma asegura que "pensamos en nós, en gañar os partidos, que é o que necesitamos, o que fai falta. Logo cando sumemos, veremos ao final".

Preguntado polo cambio de sistema na pasada xornada, o defensor deportivista sostén que "o máis importante do partido foi non encaixar goles. Estivemos ben neste sentido. É o máis importante, o que necesita todo o equipo. Isto foi unha melloría importante. Toca seguir así". "O cambio de sistema son cousas do míster. O míster pensa o mellor para nós en cada partido. O que podemos facer é saltar ao campo a dar o 110 % en cada partido", puntualiza.

Pensa que no momento actual polo que atravesa o Deportivo, "calquera cousa vénnos en contra. Toca traballar. A única solución que coñecemos todos é traballar".

Así mesmo, resta importancia aos nervios que poida haber presentes no vestiario: "Cada un quere o seu mellor rendemento en cada partido e cando non o consegue está con nerviosismo. Pero isto son cousas normais".

A nivel persoal, confesa que esta situación clasificatoria "é unha experiencia nova na miña carreira. Aquí vese quen son os homes e quen non. Nós somos todos homes. Por iso estou convencido de que imos saír disto. Confío moitísimo nos meus compañeiros, o corpo técnico, na directiva, en todos os que traballan no Club. Estou convencido de que todos sairemos disto".

Do encontro no Anxo Carro de Lugo deste domingo 1 de decembro (18:00 horas, Movistar LaLiga), indica Somma que "para nós calquera partido é importante contra calquera equipo. Nós necesitamos gañar, os 3 puntos. Así que calquera partido é importantísimo".

Máis novas de: MICHELE SOMMA