Teresa Abelleira, capitá do Deportivo ABANCA, participa en Albania coa Selección Española Sub-19 nun Mini Torneo Elite clasificatorio para o Europeo da categoría.
O rival hoxe sábado na segunda xornada de competición foi Azerbaiján. De novo houbo goleada española (6-0), aínda que esta vez a xogadora branquiazul non chegou a saltar ao terreo de xogo.
Con este resultado, España está virtualmente clasificada para a Rolda Elite da categoría, o vindeiro ano en Suíza.
Na primeira xornada, ante a anfitrioa Albania, Teresa Abelleira foi titular na contundente vitoria (0-8) e anotou dous goles, o 0-2 e o 0-4, ambos na primeira metade.
O martes 31, a Selección Española finaliza a súa participación ante Ucraína.
Teresa Abelleira será baixa no Deportivo ABANCA, que mañá domingo 29 de outubro ás 12:00 horas recibe en Ponte dos Brozos (Arteixo) ao CF Vimenor, na 7ª xornada do grupo 1º de Segunda División Nacional.
