Juanfran, un dos capitáns do Deportivo, desvelou esta mañá na sala de prensa de Abegondo que os titulares onte en Cornellá El Prat tiveron unha charla no campo 2 da Cidade Deportiva con Pepe Mel, xusto antes de iniciarse o adestramento: "En todo o que nos dixo tiña máis razón que un santo. Identifiqueime con todo o que nos dixo".
Ademais, asegura o lateral deportivista que "o equipo está co adestrador. Nós podemos dar un paso adiante. El ten moita forza, é un adestrador veterano, que xa estivo nestas situacións. Para min é o idóneo para este equipo, para este Club. Así se pensou no verán. Nós imos a matar con el". Razoa que "quen mellor que alguén que xa estivo en situacións así complicadas para sacar isto adiante, como xa demostrou cando veu hai cinco meses. É o mesmo adestrador que nos sacou dun momento fodido".
Advirte Juanfran que "a nosa idea non cambia por seis partidos. Confiamos no adestrador, no que quere. O que temos que facer é tentar que as cousas nos saian mellor para que cheguen as vitorias e todo se tranquilice".
É consciente que se o Deportivo derrota este sábado 30 de setembro no Estadio ABANCA-RIAZOR ao Getafe (13:00 horas, Bein LaLiga) "todo cambia, a nivel clasificatorio, a nivel anímico. Vai ser un xute de enerxía forte para poder traballar esas dúas semanas e seguir puíndo eses defectos que nos están facendo tanto dano".
Recoñeceu que, con 4 puntos sobre 18 posibles, "está a facerse moi complicado este inicio de liga, con momentos moi fodidos, derrotas moi duras. As cousas non saen como esperamos e temos que seguir traballando e seguir tentándoo".
Recalca que o vestiario está "fodido, como está todo o que quere ao Deportivo. Nós máis porque somos profesionais e moléstanos no orgullo. É complicado, non saen as cousas como queres".
Sobre a derrota ante o Espanyol, Juanfran sostén que tras o 3-1, o equipo desconectouse: "O equipo nunca nunca se pode desconectar. O equipo sempre ten que estar metido no partido porque representamos a un Club moi grande e non podemos cometer ese erro de desconectar".