Federico Santiago Valverde Dipetta (Montevideo, 22 de xullo de 1998) superou esta mañá o recoñecemento médico no Hospital HM Modelo da Coruña e converteuse no primeiro reforzo do RC Deportivo para a Temporada 2017-2018.
O mediocentro uruguaio, cedido esta campaña polo Real Madrid, manifestou aos medios de comunicación, no propio centro hospitalario coruñés, que a súa chegada ao Dépor "é un reto moi grande. Estou moi feliz desta nova etapa. Hai que aprender moito".
Asegurou que este salto a Primeira División "é o primeiro paso importante na miña vida e vouno a aproveitar ao máximo".
Fede Valverde cre que pode achegar ao equipo "ganas, actitude, que iso non se di acá, senón hai que demostralo na cancha. Vou axudar ao equipo co máximo que teño".
Non lle asusta a competencia no centro do campo branquiazul: "Desde chiquito competín en Peñarol. Vou estar con bos xogadores que os vía pola tele hai un ano. Téñoos agora preto, vou contar coa súa axuda. Vou competir con eles dunha boa forma".
Admite falar con ex xogadores uruguaios que pasaron polo Dépor, como Walter Pandiani: "Contáronme cousas lindas e tomeino como axuda para vir a este Club".
Mañá mércores, Fede Valverde porase ás ordes de Pepe Mel na Cidade Deportiva de Abegondo, no primeiro día de traballo do Deportivo.
