RCD / NOVAS

Villares cre que o triunfo ante a UD Logroñés "reforza moito moral e sobre todo futbolísticamente para afrontar o que nos queda"

05/05/2022 19:54

Diego Villares admitiu en rolda de prensa esta mañá que "botaba en falta" volver á súa posición natural de mediocentro despois de varios partidos na posición de lateral dereito: "Volver ao centro do campo sempre é agradable e máis cando levas xogando sempre. Dáche máis confianza. Nunha posición distinta podes xogar máis atado". Iso si, insiste en que está "encantado de poder axudar ao equipo onde sexa".

O futbolista lucense quere chegar ao playoff "coas mellores sensacións posibles e iso implica que de aquí ao final se podes gañar os partidos que quedan, perfecto. E se non, chegar en bo ton físico e un bo ton futbolísticamente falando que nos permita chegar con confianza a eses partidos que son clave".

Aínda que está de acordo en que gañando os dous partidos que restan en ABANCA-RIAZOR (CD Tudelano e Unionistas de Salamanca CF) pode ser suficiente para amarrar a segunda praza, "non nos podemos conformar con iso e moito menos cos resultados que estamos a ter fóra de casa que creo que é un aspecto a mellorar. Sexa onde sexa o playoff vas ter que competir neutralmente entón tamén temos que dar ese puntiño máis fóra de ABANCA-RIAZOR".

O triunfo da pasada fin de semana ante a UD Logroñés deixa "sobre todo unha moi boa sensación, ante un rival directo da parte alta que che reforza moito moral e sobre todo futbolísticamente para afrontar o que nos queda. Sabiamos que era un partido clave e sacalo adiante con esa suficiencia ao vestiario dálle moito".

Do mesmo xeito que manifestaron estes días o resto de compañeiros, cre que "o último que temos que facer agora" é entrar a valorar as alusións ao Dépor na celebración do ascenso do Real Racing Club: "Temos que dedicarnos aos partidos que nos quedan, a afrontar eses partidos de playoff coa maior ilusión posible e coas ganas que se debe".

Tampouco quere saber nada da súa renovación "neste momento clave da temporada. Cando se teña que facer, farase. Por min, encantado de seguir aquí".

Máis novas de: DIEGO VILLARES