Diego Villares admitiu esta mañá na sala de prensa de Abegondo que "pode ser que este último partido (en Mérida) custásenos un pouco máis xerar xogo e ocasións. Fóra de ABANCA-RIAZOR ningún equipo vaino a pór fácil. Todos os equipos van competir até o último minuto, con resultados curtos como tivemos esta fin de semana".
Por conseguinte, con estes dous primeiros partidos, comenta que "podemos estar satisfeitos porque é un pleno de puntos, pero no xogo temos bastante marxe de mellora e iso a medida que pasen as semanas podemos logralo".
A nivel persoal, desvela que a orixe da lesión de xeonllo que sufriu nesta pretemporada "foi desa que tivera contra o Albacete (no play off último de ascenso). Aquí nun adestramento, nun mal golpeo, volvéuseme a abrir un pouquiño. Agora xa está recuperada totalmente. Levo esa vendaxe simplemente por precaución e por sentirme máis seguro eu mesmo tamén. Pouco máis vai aguantar esa vendaxe no xeonllo", engade.
O centrocampista branquiazul explica que, respecto ao ano pasado, o seu rol no equipo é "un pouquiño distinto. O ano pasado xogaba máis liberado por diante, con Juergen case sempre e con outro xogador por detrás. E esta temporada hai que aguantar un pouquiño máis a posición ou non facer sempre esa saída sectorizada como faciamos os dous interiores. Este ano hai que suxeitarse un pouquiño máis por dentro e dar esa función por diante da defensa".
Do Pontevedra CF, rival este domingo 18 de setembro ás 19:00 horas en ABANCA-RIAZOR (TVG-2, InStat.tv), destacou que "mantén a base do ano pasado que o trouxo até Primeira Federación. Fixo unha moi boa campaña. Os números están aí. O partido do domingo ante o CF Talavera está un pouco máis desvirtuado porque xogaron desde o principio cun máis pero temos os outros dous partidos para analizalos de cara a este domingo".
Do conxunto granate queda "sobre todo co xogo que mantén desde o ano pasado. É un equipo que xoga ao fútbol moi ben e non nos vai a pór as cousas nada fáciles. Vannos a apertar desde o principio e iso é un aceno de identidade súa".
De volta esta fin de semana a ABANCA-RIAZOR, Villares cre que "todos asinariamos xogar todas as fins de semana en casa, xa non só polo ambiente, polo campo, senón pola sensación que che dá todo iso. Todo o mundo dentro do vestiario ten ganas de volver a ABANCA-RIAZOR e gozar outra vez do fútbol".
Con varios partidos en casa neste tramo ligueiro, posto que o mércores 28 xogarase o partido aprazado da 1ª xornada ante o CF Talavera, cualifícaos como "importantes. Pódennos dar ese punto de confianza e bo xogo que necesitamos".
