O Deportivo coñecerá este martes 11 de novembro ao seu rival na segunda rolda da Copa del Rey.
A eliminatoria, a partido único, xogarase entre o martes 2 e o xoves 4 de decembro.
O sorteo será a partir das 13:00 horas, retransmitido en directo por Teledeporte, Movistar Plus+ e as canles oficiais da RFEF.
Como na anterior rolda, os criterios de proximidade marcarán o emparellamento.
Así, o Dépor quedou encadrado no grupo 1 ou grupo norte con estes equipos:
Primera División: RC Celta, Real Sociedad, Deportivo Alavés, CA Osasuna, RCD Mallorca, RCD Espanyol e Girona FC.
Segunda División: CD Mirandés, Real Racing Club, SD Eibar, Sporting de Gijón, Burgos CF, Cultural Leonesa, SD Huesca, Real Zaragoza e FC Andorra.
Primera Federación: Racing de Ferrol, SD Ponferradina, Pontevedra CF e CE Sabadell FC.
Segunda Federación: CD Numancia, CD Atlético Baleares, UE Sant Andreu, Reus FC Reddis e CD Ebro.
Tercera Federación: Portugalete.
Campión de Copa Federación: Ourense CF.
Precisamente a bóla do Ourense CF será a que se extraia en primeiro lugar no sorteo cun rival de Primera División do seu ámbito xeográfico.
A partir de aí, os equipos de Tercera, Segunda e Primera Federación serán os seguintes en coñecer aos seus rivais sendo emparellados comezando cos de Primera División.
Así pois, "só algúns clubs de Segunda División xogarán contra outro da mesma categoría coa orde de extracción das bólas como factor que determinará cal dos conxuntos exerce como local e cal como visitante" segundo explica a Federación Española na súa páxina web oficial.
Na primeira rolda, o Dépor apeou á UD Sámano ao vencer en Castro Urdiales por 1-4.
