Eisenman é declarado afeccionado deportivista e, tras quedar encandeado cos caneos de Djalminha e pola localización do Estadio de Riazor, a escasos metros da praia da Coruña, ofreceulle ao presidente do club, Augusto César Lendoiro, un esbozo do que sería, para o norteamericano, "o estadio máis bonito do mundo".
O pasado mes de maio, o Deportivo presentou aos medios de comunicación e aos afeccionados o proxecto dun novo estadio de Riazor deseñado por Peter Eisenman e aínda ten esperanzas, despois de varios meses de espera, ensinalo ao alcalde da Coruña, Francisco Vázquez. Posteriormente, foi o alcalde de Culleredo, Xullo Sancristán, quen ofreceu uns terreos (250.000 metros cadrados) ao Deportivo para construír un novo estadio.
